Forsamlingslokalet på Eikelund var proppa fullt av menneske som var klare for å spreie julestemning da demens- og seniorkoret til Røde Kors organiserte den siste samlinga for året. Leiar i omsorgstenesta til Hyllestad Røde Kors, Ann-Lise Birkeland, kunne melde om eit usedvanleg stort oppmøte.

– Til vanleg plar vi vere ein plass mellom 24 til 30 stykk som kjem og syng, men i dag var vi heile 68 stykk. Vi hadde nemleg invitert med oss dei ukrainske og syriske flyktningane som er i Hyllestad for å vise fram institusjonen vår, og vise fram norske tradisjonssongar, til dei.

Hyllestad Røde Kors Omsorg har arrangert demens- og seniorkor kvar tredje veke gjennom heile året der ein gjeng på 6-7 frivillige har stilt opp, spelt piano og gitar, og sunge med.

– No nærmar året seg slutt, og det har vore veldig kjekt å kunne komme hit og synge med koret her på Eikelund. Vi i Røde Kors Omsorg hadde også med oss 39 julegåver hit i dag som vi delte ut til dei som har tilknyting til Eikelund, og som dei kan få opne på julaftan, fortel leiaren.

Rekordmange med på kor

Integrering står også Birkeland sitt hjarte nært. Ho er i tillegg til innsatsen i omsorgstenesta også med som koordinator i Røde Kors Flyktningvenn, så for ho var det svært triveleg at ei stor gruppe med flyktningar ønska å vere med på songstunda måndag.

– I tillegg til å vere med i Røde Kors Omsorg er eg også ein av to koordinatorar for Røde Kors Flyktningvenn, så integrering og aktivitet for flyktningar er noko eg er veldig opptatt av. Gjengen i koret her tenkte at denne songstunda kunne vere ein fin arena til å vise tilboda vi har i kommunen vår, men også vise fram det frivillige arbeidet som det er mogleg å bli med på. Det var utruleg kjekt å sjå kor mange som enda opp med å ta turen innom, og som vart med på songen.

Songstunda gav tydelegvis meirsmak, for Birkeland fortel at fleire allereie har vist si interesse for å bli med på frivillig arbeid gjennom Røde Kors til neste år.

– Det er fleire som har komme bort og sagt at vi no har ufarleggjort frivillig arbeid og Røde Kors, så no håpar vi at enda fleire vil melde seg inn og vere med på arbeidet vi gjer. Vi planlegg ein tur til Dagsturhytta her i Hyllestad i romjula, så da håper eg og gjengen min at vi får vise fram enda fleire positive sider ved Røde Kors Omsorg.

Mykje aktivitet gjennom året

Gjennom året har gjengen i omsorgstenesta funne på mykje aktivitet og moro med mellom anna barseltreff, aktivitetsdagar, sommarfest og busstur til Askvoll. Seinast førre veke var ein gjeng frå gruppa med på å servere julemat til bebuarar på Eikelund, så det er stor variasjon i det frivillige arbeidet som gjengen gjer gjennom eit år. Dei håpar at 2025 vil bli like suksessfullt og innhaldsrikt som 2024.

– Om kommunen får i  gong serviceruta til neste år, så eldre heimebuande kan bli med på kortreffa våre, hadde det vore veldig fint. Det er enklast for oss å stelle i stand ting her på Eikelund, for her har vi lokale å vere i. Vi har allereie eit tett og godt samarbeid med dei som arbeider på omsorgssenteret, så eg har stor tru på at det skal vere mogleg å oppretthalde og kanskje til og med auke aktivitetsnivået her til neste år.

Birkelund håpar også at fleire vil bli med i Røde Kors framover.

– Til fleire hender som hjelper til, til meir aktivitet kan vi ha, seier ho.

– Vi får midlar frå Røde Kors Sogn og Fjordane til å stelle i stand forskjellige ting, noko som er veldig fint, men vi vil trenge meir folk til å gjennomføre alt vi vil gjere. Det er meir enn nok av gode idear og draumar om kva vi kan organisere, så det hadde hjelpt veldig på med fleire medlemmar som kan hjelpe oss med å få realisert desse tankane.

Det vart også tid for litt gåveoverrekking og julehelsingar under samlinga måndag, mellom anna frå ordføraren, og omsorgsgjengen i Røde Kors gav også konfekt til dei tilsette på Eikelund.

– Dei er heilt fantastiske. Eg må også få skryte litt av resten av gjengen eg har med meg i Røde Kors Omsorg. Dei stiller opp gong på gong, og eg er så glade i dei. Utan dei hadde vi ikkje fått til alt vi gjer på gjennom året.