Bedehuset i Vadheim stod ferdig i 1914, og vart vigsla til kyrkjeleg bruk i 1954.

Det har opp gjennom åra blant anna blitt brukt til gudstenester og Vadheim Musikklag sine julekonsertar.

– Med eit litt labert besøk til gudstenestene og lite bruk elles dei seinare åra, vert det å drifte eit slikt bygg når det kjem til vedlikehald og høge driftskostnadar veldig tungt, fortel Fossen til Ytre Sogn.

Ulike aktivitetar

Han legg til at bedehuskapellet, som stort sett har blitt brukt og leigd av kyrkja til mellom anna gudstenester og gravferder, er eit lokale som også kan nyttast til andre aktivitetar.

– Eit godt døme på det er arrangementet som fann stad under årets Vaimamarknad der arrangøren i samarbeid med Høyanger historielag hadde seminar om senkinga av Oldenburg 7. april 1945 med rundt 100 menneske til stades her.

Eigd av bygdefolket

Ifølge Fossen har tema kring bruken av bygget vore oppe til diskusjon både i Kyrkjebø sokneråd og Høyanger kyrkjelege fellesråd. Sistnemnde er eigar av dei andre kyrkjebygga og gravplassane i kommunen, medan bedehuskapellet i Vadheim er eigd av bygdefolket. Styret for huset er representerte på møtet denne måndagen.

– Saman med styret skal vi planlegge og gå igjennom korleis dette folkemøtet skal gjennomførast. Det kjem blant anna til å bli litt orientering av ulikt slag, og så vil vi prøve å få til ein diskusjon med dei frammøtte om kva vi kan gjere med dette bygget. Men det vil berre bli diskutert kring tema, og ikkje vere noko som skal bankast gjennom eller avgjerast der og da, forklarar han.

Bedehuskapellet si framtid

Styret i Vadheim bedehuskapell, Irene Aase Aarseth, Andreas Ester, og Sturla Bell Fossen oppmodar innbyggjarane i Vadheim til å stille opp på folkemøtet 15. september, og håpar at så mange som mogleg tek turen for å vere med på å diskutere framtida til bedehuskapellet deira.

I tillegg til driftsmidlar på 30 000 kroner i året frå kommunen har styremedlemmane også brukt tallause dugnadstimar på å vedlikehalde det gamle bygget. Men med auka prisar på straum, forsikring, og kommunale avgifter, vart 30 000 kroner for lite til å dekke alle utgiftspostane i 2023.

– Vi sende derfor inn ein ny søknad i fjor om 55 000 kroner, og fekk innvilga 45 000 kroner. Det er stadig ting som må gjerast med slike gamle bygg, som blant anna innvendig og utvendig målearbeid, vasking av tak og veggar, og fliser på taket som må skiftast ut. Det er jo ei generell stor dugnadsånd i bygda. Det å få folk engasjert i det vedlikehaldsarbeidet som dette bygget treng ville vore til stor hjelp, seier tidlegare styreleiar Arthur Hovland.

Få til eit engasjement 

Eit spørsmål som fellesrådsleiaren tok opp var om kyrkja skal fortsette å betale leige av eit bygg som over tid vil forfalle dersom ein ikkje opprettheld vedlikehaldet, eller klarer å samle folk til gudstenester.

– Dette er ei spørsmålsstilling som vi sikkert må ta opp og diskutere, men i staden for å sei at alle kyrkjelege aktivitetar skal flyttast til Kyrkjebø kyrkje, så vil vi at bygdefolket skal bli merksame på kva som skjer, og få eit engasjement rundt det før ein eventuelt tek eit endeleg standpunkt, seier Bell Fossen.