– Det er utruleg kjekt å bli lagt merke til og sett pris på. Eg føler dette er ein pris for heile bygda, for vi har eit godt samarbeid med fleire lag og organisasjonar her, og medlemmane våre er både unge og eldre.
Idrettslaget har som mål å stelle i stad gratis aktivitetar og skape positive sosiale arenaer for innbyggjar i alle aldrar.
– Vi er ikkje eit tradisjonelt idrettslag sidan vi ikkje har eigne fotballag eller handballag, men vi prøver å skape sosiale arenaer som fremmar både fysisk og psykisk helse. Vi prøver å få med oss alle, og lage til gratis tilbod som alle kan nytte seg av.
Olsen fortel vidare at å få ein slik gjev pris motiverer til vidare arbeid, og at dei ser at det dei gjer gir positive ringverknadar.
– Vi er glade i bygda vår og vil at fleire skal sjå kor bra det er å bu her. Derfor prøver vi å skape aktivitet og bulyst, og vi ser det fungerer. Fleire unge par flyttar heim for tida, og alle gamle hus her bli selt og flytta inn i.
Utvalsleiar for samfunn i Høyanger, Monica Oppedal, fortel at det var fleire grunnar til at Vadheim Idrettslag fekk prisen.
– Vi var ikkje i tvil når det kom til kven som skulle få kulturprisen i år. Vadheim Idrettslag gjer så utruleg mykje anna enn berre idrett i byda, og er utruleg flink til å berre satse og prøve ting. I tillegg er dei veldig synlege, og møter opp og deltek på ulike arrangement. Det er litt utypisk å gje Kulturprisen til eit idrettslag, men dei er absolutt verdige vinnarar, seier Oppedal.
Grunngjevinga frå Utval for samfunn i Høyanger kommune
Lag og organisasjonar vert rekna som grunnpillarane i vårt kulturliv, og blant desse har idrettslaga ein sentral og sikker plass.
Den organiserte idrettshistoria i Vadheim går heilt tilbake til 1933, då Vadheim Idrettslag vart stifta. Frå før var det då to idrettslag i Høyanger, og det var først etter krigen at det vart skipa idrettslag i dei andre bygdene i kommunen. I dag har Vadheim IL 160 betalande medlemer.
Vadheim Idrettslag har gjennom mange år og tidsepokar vore ein stor kulturberar, som gjev eit godt idretts- og mosjonstilbod til barn, ungdom og vaksne i Vadheim.
Idrettslaget har i dag tilbod innan fotball, trim, yoga, turbok-trim og fritidsklubb, dette i tillegg til å drifte fleire ulike anlegg dei har opparbeidd på dugnad dei siste åra. Nemnast kan lysløypa på Tangen, treningssenter, kunstgrasbane, sandvolleyballbaner, golfanlegg, frisbeepark og badeplassen på Kikken. Seinast i fjor opna ballbingen ved oppvekstsenteret der ein kan drive med både basketball, fotball, volleyball og tennis. Alt opparbeidd gjennom felles dugnader og innsamla midlar.
Vadheim IL har heile tida planar om nye trivselstiltak i bygda, med mål om å skape sosiale møteplassar der fokus på glede, inkludering, gratisprinsipp, «lavterskel» og dugnadsånd står i fokus.
For ei lita bygd som Vadheim er det av stor verdi å ha eldsjeler i eit idrettslag som nyttar ein stor del av fritida si til arbeid blant barn og ungdom. Idrettslaget har hatt svært mykje å seie for både yngre og eldre sin trivsel i bygda.
Det er vanskeleg å måle verdien av det arbeidet idrettslaget gjer i lokalsamfunnet, både av kulturell, sosial og førebyggjande karakter, men det er ikkje i tvil om at Vadheim IL, gjennom felles innsats i over 90 år, har fått ein stor og sentral plass i kulturbildet i kommuen vår.
Vadheim IL har gjennom sitt mangeårige arbeid vore med på å setje Høyanger kommune på kartet. Ein kulturpris vil vere med å gje laget inspirasjon til vidare arbeid til beste for born, unge og eldre i Vadheim.
