At dans er bra for både kropp, sjel og toppetasjen er veldokumentert, og noko dei 14 aktive dansarane i Kyrkjebø Seniordans kan skrive under på. Sosialt er det og, ifølge leiar Elsi Berge og dei andre i dansegruppa.

– Det er kjekt å kunne komme hit på onsdagane til den faste gjengen og bruke to timar saman til dans og sosialt samvær. Og så reiser vi og fast ein gong i månaden opp til Sande og dansar saman med Gaular Seniordans. Nokre turar til samlingar i Loen, Balestrand og Førde blir det gjerne og, så det er bra med aktivitet i laget.

Kyrkjebø Seniordans har eksistert i 13 år og er eit godt drifta lag. Økonomien er god, og dei tre instruktørane flinke. Dei reiser på kurs i regi av Seniordans Norge, og det er der dei får instruksjonane som blir til danserepertoaret som blir dansa ute i lokallaga, slik som på Kyrkjebø.

– Aktiviteten vår er definert som vaksenopplæring, noko som medfører at vi ikkje betalar husleige her i Kyrkjebø samfunnshus. Vi er derfor billege i drift som lag. Det kostar 400 kroner i medlemskontigent å vere med i Seniordans Norge, og så betalar vi 20 kroner kvar til å dekke kaffien kvar onsdag.

På jakt etter dei «unge»

Som for mange andre lag og organisasjonar er rekruttering viktig også for Kyrkjebø Seniordans.

– Dei fleste av oss som er med no var og med da seniordansen starta opp her for 13 år sidan. Den gongen var vi i overkant av 20 medlemmar. No er vi 16, der 14 er aktive dansarar. Mange av oss er over 80 år, så det seier seg vel litt sjølv at det må komme inn litt fleire yngre seniorar snart om Kyrkjebø Seniordans skal eksistere også i framtida.

Rekrutteringstematikken skapar engasjement i gruppa i dansepausen, og tankar blir delt om kva som kan gjerast for å få fleire med. 

– Tilbodet vårt er kanskje ikkje godt nok kjent, og vi er kanskje ikkje flinke nok til å vise oss fram til dei som kunne ha interesse av å bli med. Hos oss dansar det seniorar frå Nessane til Norevikane, og dansane blir tilpassa til alle førlegheits- og ferdigheitsnivå, så her kan absolutt alle i nærområdet bli med.

Danseoppvisningar blir nemnt i diskusjonen, og eit spørsmål om det er mogleg å skape eit samarbeid med LivOGLyst Kyrkjebø blir også stilt. Det er ingen tvil om at seniordansarane på Kyrkjebø brenn for dansen, og ønsker at andre også skal få ta del i den.

– Eg kjenner ikkje til nokon som har slutta hos oss fordi dei har ønska det sjølv. Det er såpass kjekt og helsefremjande å danse at det er noko dei som først har begynt ikkje vil slutte med, men nokre gongar må ein sjølvsagt gi seg likevel av ulike grunnar.

Kultur frå ei svunnen tid

Dansane som blir dansa på seniordansøvingane er typisk ei blanding av folkedans og tradisjonelle runddansar og turdansar. Fokuset er ikkje på å vere perfekt, men på å ha det kjekt og halde seg i aktivitet.

For seniordansarane er dans noko dei vaks opp med, og det er ikkje nett få som har møtt ektemakane sine nettopp på dans.

– Vi hadde ikkje datingappar og sosiale medier, så vi måtte ut på dans for å treffe folk og finne oss kjærastar. Dette er nok ein kulturell ballast som stadig færre har, og sjølv dei som er unge pensjonistar i dag har ikkje nødvendigvis dei same erfaringane som vi som har passert 80 har. Ulike generasjonar har vel ulike interesseområde, men vi trur jo at dans som dette bør kunne appellere også til andre enn oss som alt er med. 

Gleda av å gjere noko saman er eit aspekt i det heile, men Berge og dei andre trekker og fram viktigheita av å halde seg i form i ei tid med fokus på at eldre skal bu lengre heime.

– Det er få ting som kan matche helsegevinsten som dans gir. Det er ein komplett aktivitet der ein både må bruke kroppen og hovudet. Ein får trent balanse og koordinasjon, og ein må og hugse på trinna, noko som held ein skjerpa.