Det har no gått over fem år sidan Firda Seafoodgroup kjøpe tomta på Eide frå Hyllestad kommune med planar om å bygge ein landbase på staden. I 2021 var det folkemøte om Eide hamn på Sørbøvåg.

Sidan den gongen har innbyggjarane på Eide krangla med kommunen om planane.

Statsforvaltar stoppa første forsøk

Søker ein på Eide hamn i Hyllestad kommune sine postlister får ein opp ti sider med treff. Det har nok ikkje heilt gått heilt som Firda Seafoodgroup hadde tenkt da dei kontakta kommunen i 2019 med spørsmål om å kjøpe tomta på Eide.

Lokalbefolkning og andre interessentar på staden kom raskt på bana med innseiingar. Allereie før tomta var seld kom protestane, først på salet i seg sjølv, så i høyringsrunda og på folkemøtet. Men reguleringsplanen for Eide hamn vart likevel vedteken, tilbake i november i 2023.

Det vedtaket vart klaga på, noko kommunestyret i Hyllestad avviste. Da gjekk klaga til Statsforvaltaren, og over eit halvt år seinare kom tilbakemeldinga.

Statsforvaltaren meinte at vedtaket ikkje var godt nok utgreidd, og oppheva vedtaket. Dermed måtte kommunen greie ut saka på nytt.

Ikkje tillit til prosessen

Så spolar vi fram til november i 2024. Saka er på ny utgreia, og klar til behandling i kommunestyret. Men det vart heller ikkje beint fram. Senterpartiet, som i avstemmingane i saka fram til no har vore imot planane slik dei har låge føre, var ikkje nøgd med den nye saksutgreiinga heller.

Det gjekk så langt at kommunestyremedlemmet frå Senterpartiet, Dag Ove Austgulen Myklebust, sa at han ikkje hadde tillit til administrasjonen si handsaming av saka. Austgulen Myklebust peika på fleire punkt han meinte var unøyaktige i saka, og sjølv om desse vart retta i møtet, valde han likevel å stemme imot planen.

– Det går på heile prosessen, og ikkje direkte på administrasjonen. Det er prosessen rundt denne reguleringsplanen eg har dårleg tillit til, sa Austgulen Myklebust til Ytre Sogn etter møtet.

– Når feila i planen de påpeiker blir retta opp, og de seier at de ikkje er prinsipielt imot at Firda Sjøfarmar skal få etablere seg på Eide og de likevel stemmer imot planen, tyder ikkje det på at de ikkje stoler på det arbeidet administrasjonen har gjort?

– Eg ser at det kan tolkast som at det er ein mistillit til administrasjonen, men eg har ikkje det.

Ny runde med klagar

Men planen gjekk likevel igjennom, mot Senterpartiet sine stemmer, og ikkje overraskande kom det også denne gongen klagar på vedtaket. Og det er dei klagene som no skal handsamast i kommunestyret.

I høve vedtaket i saka frå november i fjor hadde kommunestyret også hyra inn Akvahub til å lage ein rapport på alternativ lokalisering av landbasen, og den rapporten konkluderte med at det ikkje var nokon betre stadar i kommunen til dette enn nettopp Eide hamn.

Ifølge klagarane er denne lokalitetsanalysa feil, og ikkje god nok til å fatte vedtak på.

– Kommunedirektøren vurderer at svar frå rapportskrivar knytt til blant anna biosikkerheit og naturmiljø, synleggjer kor komplekse tema dette er, og at det alltid kan vere knytt usikkerheit og ueinigheit knytt til faglege vurderingar. Kommunedirektøren vurderer at poenggjevinga og konklusjon er ei fagleg vurdering gjort av rapportskrivar, og kan ikkje sjå det er grunnlag til å avskrive denne, svarar kommunedirektør Gjermund Flage i sakspapira til kommande kommunestyremøte.

KU eller ikkje KU

Det vart også i første runde av klagesaker påpeika frå Statsforvaltaren si side at vurderinga av om det må ei konsekvensutgreiing til før ein kan vedta planen vart utgreidd etter feil forskrift.

Akkurat dette punktet var ikkje administrasjonen særleg einige med Statforvaltaren i, men har no gjort ei ny vurdering av dette og konkludert som dei gjorde tidlegare med at det ikkje er naudsynt med ei konsekvensutgreiing til planen.

Kommunedirektøren sin konklusjon er at ein ikkje tek klagene til følge.

– Kommunedirektøren kan ikkje sjå at det er kome nye moment inn i saka, i forhold til slutthandsaminga. Lokalitetsanalysa kan nyttast som fagrapport, dokumentasjon på øving for

samhandling av båtar i auste molo ligg vedlagt og universell utforming for almenningskaia er utanfor planområdet, og har derfor ikkje føringar knytt til seg, skriv han i sin samla vurdering.

Det er vanskeleg å sjå føre seg at Arbeidarpartiet, med sitt reine fleirtal, har endra syn på saka sidan sist, og blir ikkje klaga tatt til følge av kommunestyret, så blir den på ny sendt til Statsforvaltaren.