Innbyggjarane på Høyanger sørside har etter kvart blitt godt vant med at den siste båtruta frå Ortnevik til Nordeide søndag kveld er forseinka grunna hybridbåten MS «Lysefjord» sine utfordringar med lading. 

Mange har derfor meldt seg på Skyss si teneste med SMS-varsling, der ein får melding om det skulle oppstå forseinkingar og innstillingar. 

Ein av dei er Arve Søreide, som har ein son som går på Høyanger vidaregåande skule, og ei dotter som studerer i Førde. Begge er gjerne heimom i helgane, men returnerer til Høyanger tettstad og Førde søndag kveld for å ta til på ei ny skuleveke måndag morgon. Også denne søndags­kvelden skulle begge saman med andre elevar og studentar ta båten frå Ortnevik til Nordeide som normalt, men slik gjekk det ikkje.

– Eg fekk ein SMS kl. 18.41 om at Lysefjord var om lag 15 minutt forseinka frå Vik, noko som er heilt vanleg, og at denne forseinkinga også ville gjelde for avgangen frå Ortnevik kl. 19.25. Vi tok derfor høgde for dette og reiste frå Søreide sånn at vi skulle komme fram til Ortnevik rundt kl. 19.30, så ungane kunne ta båten kl. 19.40, 15 minutt etter ruta.

Men da dei unge sørsidingane kom fram til kaien i Ortnevik hadde Lysefjord alt vore der, og reist igjen med kurs mot Nordeide.

– Eg ringte da til kapteinen for å høyre om dei kunne snu, men det kunne dei ikkje. 

Søreide irriterte seg over at dei hadde fått ei melding om ei 15 minutt forseinking kort tid i førevegen, for så å bli ståande igjen etter at dei hadde justert reiseplanane sine ut frå den, men det var lite sympati å hente frå mannskapet ombord.

– Kapteinen gav eit ganske surt svar og sa at dei hadde vore forseinka frå Ortnevik, men at dei hadde tatt inn ein del tid på veg ut frå Vik, og dermed kunne gå derifrå berre to minutt etter ruta. Han sa og at vi som passasjerar må forhalde oss til rutene, og møte opp på kaiane ut frå dei.

Beskjeden om at reisefølget langt på veg kunne skulde seg sjølv for at det vart ein lang omveg via Oppedal denne kvelden gjorde ikkje humøret til Søreide noko betre.

– Kapteinen har heilt sikkert rett i at vi etter vilkåra må stille på kaien i god tid ut frå rutene, men når vi får ei slik melding om at avgangen frå Ortnevik blir om lag 15 minutt forseinka, og historikken til MS «Lysefjord» er som den er, meiner eg at det er Norled og ikkje vi som passasjerar som bør ta ansvaret for situasjonen som oppstod denne kvelden.

Søreide meiner og det er rart at det ikkje vart sendt ut ein ny SMS om at «Lysefjord» hadde tatt inn igjen tapt tid, og var så og seie ajour igjen etter ruta da båten kom til Ortnevik. 

– Når ein sender ut meldingar om at ein har blitt forseinka, så kan ein vel sende ut ei oppdatering på at det ikkje er tilfelle lengre og? Det er – som hendinga søndag er eit godt døme på – høgst relevant informasjon for oss som har tenkt å reise med båten.

Pregar innbyggjarane

Søreide er klar på at det ikkje er mannskapet ombord på Lysefjord sin feil at båten har notoriske vanskar med å halde rutene, og at dei nok må tåle mykje ufortent kjeft for noko dei ikkje sjølv har kontroll over.

– No må Skyss og Norled komme på bana med ei løysing, og ikkje berre seie at dei jobbar med saka. Kor lenge må vi akseptere denne ustabiliteten i rutetilbodet? Søndag var tredje gongen ungdomane våre måtte bli køyrt rundt heile kommunen denne hausten for å komme seg på plass på hyblane sine seint søndag kveld, og slike hendingar tærer på tolmodet til oss som bur her.

Søreide fortel at det mangelfulle båttilbodet har begynt å prege korleis innbyggjarane på Høyanger sørside ser på tilknytinga til nordsida av kommunen, og at tankar og ønske om å heller sokne sørover i kommunal samanheng blir vekka til live. 

–  Hadde dette vore eit eingongstilfelle hadde det vore greit nok, og ikkje noko å lage oppstyr over, men det er langt frå tilfelle. Når vi ikkje kan stole på at båten går etter rutene eller meldingane vi får frå Skyss og Norled, mistar vi noko av kontakten med nordsida. Det må komme ei løysing på plass som gir stabil drift, og den må komme no.