Det var ein smått forfjamsa og lettare ubekvem Ståle Walsvik ved Høyanger vidaregåande skule som måtte finne seg i å stå i rampelyset måndag da ei gruppe fornemme personar kom på besøk for å dele ut den gjeve prisen som Årets entreprenørskapslærar 2024. Det er ein pris som kvart år blir delt ut av Ungt Entreprenørskap i samarbeid med Virke.

Blant prisutdelarane var Åsmund Berthelsen, som er leiar for hovudutval for opplæring og kompetanse i Vestland fylkeskommune. Som alle andre hadde Berthelsen berre godord å seie om Walsvik denne dagen.

– Ståle har som lærar gått i førevegen og lagt til rette for entreprenørskapssamarbeid både internt og eksternt. Han er ei ekte eldsjel som står på for at elevar og lærarar skal få best mogleg utbytte av arbeidet med entreprenørskap. 

Berthelsen fekk og æra av å lese opp juryen si begrunning for tildelinga til Walsvik framfor kollegaer og elevar i kantina på skulen.

– Ståle er opptatt av at elevane skal oppleve stoltheit for eiga fag- og yrkesutøving, legg til rette for kreative prosessar, og oppmodar elevane til å prøve og feile. Han har fått til forankring av entreprenørskap som læringsprosess i leiinga ved skulen, noko som gir breiare involvering i arbeidet, og som gir resultat. 70 - 80 prosent av elevane i Høyanger deltek i ungdomsbedrifter.

Stolt mottakar

Berthelsen var ikkje den einaste som heldt tale under tildelinga til Walsvik. Også varaordførar Geir Helge Østerbø, rektor Kristin Sagerøy Råsberg, og representantar frå Ungt Entreprenørskap – deriblant sjefen sjølv – Grete Ingeborg Nykkelmo, nytta høve til å rose Walsvik og innsaten han har lagt ned i å skape unge entreprenørar. 

Sjølv er nok hovudpersonen meir komfortabel med å stå i kulissane enn i rampelyset, men han la ikkje skjul på at det var ei særs gjev utmerking å få.

 – Eg vil få framheve elevane ved skulen i ein samanheng som dette, for det er deira innsats og engasjement for entreprenørskap som skapar resultat, og som har gitt Høyanger vgs. eit solid omdøme som ein entreprenørskaps­skule. 

Walsvik trakk og fram Jardar Trollebø som jobba ved skulen tidlegare, og fundamentet han la for entreprenørskap som Walsvik har bygd vidare på sidan han kom inn som avdelingsleiar for yrkesfag i 2018.

– Vi har god kultur her på skulen for entreprenørskap. Leiinga, lærarane og elevane er vant til at vi har ungdomsbedrifter kvart år, og førebudd på at dette er ein del av undervisningsopplegget vårt. Det at vi alle er innstilt på å jobbe med entreprenørskap gjer nok noko med tilnærminga vår til det.

Walsvik er nok over snittet opptatt av samfunnsutvikling, og engasjementet for ungt entreprenørskap er berre ein del av ein større heilskap.

Han har i ei årrekke vore sentral i kontakten mellom Høyanger vgs. og lokalt næringsliv, var initiativtakaren bak etableringa av Reodorgarasjen i Høyanger i 2018, og er no ein pådrivar for å få etablert eit regionalt kompetansesenter for teknologi og Lean-metodikk i industribygda.

– Høyanger treng fleire entreprenørar og nyskaping, og det er veldig gledeleg at etableringa av kompetansesenteret, som vi har jobba med i snart fem år no, har fått skikkeleg vind i segla og ein halv million frå fylkeskommunen til arbeidet med etableringa. I eit slikt senter vil elevar hos oss, studentar under høgare utdanning og næringslivsaktørar kunne møtast for kunnskapsutveksling og utvikling som alle involverte kan dra nytte av.