Førre helg arrangerte Lavik Karateklubb vårsamling i Hyllestadhallen for femte år på rad. Nok ein gong blei det ein stor suksess med stort utbytte for både utøvarar og instruktørar.
– Denne helga er noko vi har halde på med på femte året no, og det er alltid like kjekt å arrangere den. Vi er ein klubb som er medlem av ein organisasjon som ikkje har så mange klubbar rundt om her, så det er kjekt å få til noko lokalt i staden for å alltid måtte reise vekk, fortel leiar av Lavik Karateklubb, Tom Jakobsen. Til vanleg plar klubben reise rundt i landet for å trene med andre klubbar. Denne helga hadde dei fått besøk av to instruktørar som har drive med karate på europeisk toppnivå, og invitert med seg andre på treninga. – Vi prøver å skape engasjement rundt sporten og har invitert med oss klubbar frå rundt om i heile Noreg for å bli med på denne helga. Vi har også fått med utøvarar frå Høyanger karateklubb, sjølv om dei driv med ein anna type karate enn oss. Denne helga har ekstra gode instruktørar på eit høgt internasjonalt nivå kome for å leie treningane, noko som gjer det ekstra gøy å vere med, seier Jakobsen.
Fokus på kamp og konkurranse
Treningane denne helga hadde fokus retta på kamp og konkurranse, med håp om å trygge deltakarane i ulike situasjonar. – Konkurranse er ein stor del av sporten, og er noko vi ikkje får trena så mykje på, så å få ei heil helg med fokus på dette er veldig bra. Det er skjeldan vi berre trener kamp, og med gode instruktørar er dette blitt veldig proft, fortel Jakobsen. Målet med helga, fortel han vidare, er at utøvarane skal bli glade i konkurranseforma i karate, og søke og delta på stemne rundt om kring. Det er også mogleg å delta på NM og EM i sporten, fortel han. – Vi starta fredag og laurdag med trening på teknikk, før det vart eit kurs om hjarte- lungeredning. Søndag skal vi gå over til å trene i ein reell konkurransesituasjon der vi sparrar mot kvarandre. På kveldane har vi sosial samvær med quiz, mat og overnatting.
God respons frå deltakarane
I hallen i Hyllestad var både unge og vaksne i gang med trening da Ytre Sogn kom på besøk laurdag. Responsen var god i frå alle aldersgrupper. – Eg er nok den eldste som er med, og har drive med karate i fire år no. Eg synest det er ein fantastisk sport å helde på med og det viktigaste for meg er å trene styre, uthaldenheit og teknikk. Det krev litt av ein mann på 61 år, men det er utruleg godt å halde på med, fortel Erlend Yndestad, som var med i helga. Yndestad har vore med på liknande helger før, og seier at dei berre blir betre og betre. – Instruktørane som er med i dag har vore her før så dei får byggje på det dei har starta med tidlegare, så øktene blir berre betre og betre. Vi er den klubben som ligg lengst nord i organisasjonen vi er med i, så vi er vant til å reise for å vere med på slike arrangement. Da er det utruleg kjekt å sjå andre klubbar kome og vere med oss. Eg håpar berre at enda fleire vil vere med, både frå andre klubbar og nye her lokalt, fortel han vidare. Karate har vist seg å bli ein familieaktivitet for fleire, og for Heidi Helle Lindenskov og dottera Ea Helle Lindenskov har helga vore super. – Eg har vore med i halvanna år no, og det er første gong er med på ei slik helg i Hyllestad. Ein får heilt andre inntrykk og treningsmåtar enn på vanleg trening. Det er veldig kjekt å møte att dei same folka og ha dette samhaldet i sporten. I Lavik er det ein del damer over 40 som har byrja på karate, og eg trur mange av oss har møtt på dei same utfordingane, så det er fint å trene med likesinna, ler Heidi. Begge synest treninga har vore godt tilpassa for alle aldersgruppe og graderingar. – Det har gjort det enklare å lære, er dei einige om. – I morgon skal vi prøve å sparre, og det er det nok ein av oss som er litt meir gira på enn den andre, seier Heidi medan Ea smilar og nikkar lurt. – Eg synest det sosiale er veldig kjekt med desse helgene. Eg har vore med i litt over eit år no, og det er alltid kjekt å ha trening, der vi også er med kvarandre på kveldane og finner på noko gøy, fortel Ea.
Instruktørar på høgt nivå
Karateklubben hadde fått med seg to instruktørar som begge har drive med sporten på toppnivå i Europa. – Det er ein lang køyretur, men alltid veldig koseleg å kome hit. Vi blir alltid godt motteke og det er kjekt å få kome hit og undervise i det eg kan, fortel ein av instruktørane, sensei Richard Larsen. Larsen synest slike helger får fram mykje frå kvar individuell utøvar. – Det er mange forskjellige menneske som er med denne helga, alt frå junior til senior, så det er veldig kjekt å sjå kvar individuell få til noko og utvikle seg. Karate er ein veldig utbreidd sport, så sjølv om ein er langt i frå heim så kjennes det forsett veldig nært. Gjennom helga har sparring og taktikk vore fokus. Dett er for å ufarleggjere eit, for mange, skummelt fenomen i sporten. – Målet med denne helga er å ufarleggjere sparring. Mange synets det er skummelt, og det skjønnar eg godt. Då er det viktig å ha gode teknikkar i botn og vite korleis ein sparrar riktig for å unngå skadar.
