I tidlegare tider arrangerte KUL-koret på Kyrkjebø «Syng med oss» kveldar etter same lest som det populære TV-programmet, men det begynner å bli lenge sidan no. Koret, som har vore i vekst dei siste åra, og som no tel 35 aktive medlemmar frå heile Høyanger kommune, bestemte derfor at det no er på tide å igjen invitere heimbygda til ein musikalsk kveld der det også vil vere mogleg få seg ein kopp kaffi og litt å bite i.

– Det har i all hovudsak vore på julekonserten og under 17. mai-feiringa at vi har opptreddher heime på Kyrkjebø, arrangement som har sine tradisjonsrike rammer, så no hadde vil lyst til å lage til ei litt meir uformell samling, fortel leiar for KUL-koret, Sissel Tove Litzheim.

29. september blir det derfor  allsong og sjølvsagt korsong på Kyrkjebø, og KUL-koret har også fått med seg Harald Dahlstrøm og Knut Henning Litsheim som gjestar. Spesiell gjest denne kvelden blir kulturskuleelev og stortalen Kalina Dabek på piano. Dirigent blir – som alltid i KUL-korsamanheng Sjoerd Tolsma.

Travelt kor

Det er tette program KUL-koret har hatt dei siste åra, og det har også balla på seg etter kvart da dei som har fått koret på besøk eitt år gjerne inviterer dei tilbake det neste.

– No konsentrerer vi oss om korkaféen i månadsskiftet, men alt 12. oktober skal vi delta på ei folkemusikkmesse her i kyrja på Kyrkjebø som organist og musikar Kjell Ivar Aase står bak. Etter det er det ikkje mange vekene før julesesongen byrjar med første julekonsert for oss 1. desember på Nessane grendehus.

Litzheim fortel at det går slag i slag, og at koraktiviteten må planleggast eit år i førevegen for at dei skal ha kontroll på alt som skal skje.

 – Alt vi er med på er kjekt, men eg må vel kanskje trekke fram julekonsertane vi har på sjukeheimane og helsesentera rundt om i kommunen som ekstra meiningsfulle. Nytt av året er at konserten vi har pleid å ha på sjukeheimen i Høyanger blir flytta til kantina på Høyanger helsesenter slik at også bebuarar på omsorgsbustadane og på dagsenteret kan vere med.  Det at fleire ønsker å høyre oss synge er noko vi set stor pris på.

Samlar opp

Det er eit breitt repertoar KUL-koret opererer med. Dei syng alt frå lokale «D/S Fanaraaken» til sakral folkemusikk og  julemusikk.

– Vi prøver å legge inn nokre songar i øvingane til ulike konsertar som har ein felles raud tråd, og så «samle dei opp» til ein felleskonsert seinare. No har vi ein tanke om å få laga til ein konsert som utelukkande inneheld musikk frå artistar på Vestlandet, noko som er grunnen til at ein også kan finne songar frå mellom anna Olav Stedje og Vamp på programmet til korkaféen.