– Det er så utruleg kjekt og over all forventning at det kjem så mange folk innom på julemessa som vi har laga til her i dag, seier Marianne Haugland Norevik på Høyanger dagsenter til Ytre Sogn.

Ho legg til at bakgrunnen for messa er at dei ønsker å få vist fram kva dei held på med på Høyanger dagsenter, og gjerne få selt nokre av dei fine tinga som brukarane ved dagsenteret har laga.

– Her finn ein blant anna kjempefine strikka genserar, sokkar, luer, tova sitteunderlag, tepper, puter, nissar og juletre laga av trebitar som vi har beisa. Dei har vi fått god hjelp av vaktmeisteren til å lage.

– Vi begynte med julemesse i fjor der vi kopla oss opp på det som vart arrangert på Høyanger samfunnshus i samband med julegateopninga. Det passa dessverre ikkje for oss denne gongen, og derfor valde vi å lage til vår eiga julemesse her på dagsenteret. Og med det fantastiske oppmøte som vi har hatt her i dag så trur eg at vi kjem til å satse på å gjere dette til ein fast tradisjon her, seier ho og ler.

Sosial arena

Ifølgje Haugland Norevik har dagsenteret 12 faste plassar der nokre av brukarane er der kvar dag, medan andre gjerne er der to eller tre dagar.

– Om det er dagar vi har ledige plassar kan andre frå sjukeheimen komme hit, slik at vi kan involvere fleire. På dagsenteret har vi mange kreative sjeler, så her held vi på med mange forskjellege ting. I tillegg til mykje handarbeid har vi blant anna bingo, dagleg trim, turgåing og sosialt samvær. Sistnemnde er nok også noko av det viktigaste, forklarar ho.

Ho legg til at ein ikkje treng å vere god i handarbeid for å vere på dagsenteret.

– Dette er ein sosial arena for dei brukarane som ikkje held på med noko spesielt, men berre ønsker å ha ein fast plass å gå. Det er svært viktig, fordi einsemd er noko som tek mange. Vi har også felles middag kvar dag for alle som har plass på dagsenteret, noko som er veldig viktig med tanke på ernæring. To av dagane er middagen dei får laga av dei på sentralkjøkenet her. Den ferdiglaga maten kjem direkte frå kjøkenet og da kan brukarane forsyne seg sjølv og ete så mykje dei orkar.

Ein flott samlingsplass

Rundt eit rundt bord finn underteikna fleire av dei kreative sjelene som har bidrege med mykje fint handarbeid til denne dagen.

– Det å ha ein slik sosial samlingsplass som dagsenteret betyr alt for oss, og noko vi alle ser fram til kvar dag vi skal hit. Når det kjem til dette med handarbeid, så er det å strikke, hekle og brodere noko vi har halde på med i mange år. Og resultatet av noko av det vi lagar ser du utstilt her i dag. Vi tykkjer det er veldig kjekt å arrangere julemessa her på dagsenteret, og håpar at vi kan fortsette med det i åra som kjem, seier den hyggelege gjengen med damer.

Familiesamling og fine minner

Dei fortel vidare at handarbeidet som dei lagar, vere seg genser, sokkar eller luer, er kjærkomne gåver som familiemedlemmar også set stor pris på å få under juletreet.

På spørsmål om dei har ei historie eller gode juleminner svarar dei;

– Vi deltok på mange juletrefestar, og det tykte vi var morosamt. Men det beste med jula både da og no er å vere samla med familien. 

Under praten med damene kom også Bjarne Thune og sette seg ned. Og denne karen hadde ei morosam historie han ønskte å dele frå sin barndom.

– Eg fekk ein knallpistol i julegåve. Og etter at vi hadde lagt oss julekvelden, så vakna eg brått av at broren min som hadde stått opp igjen og stod å skaut med knallpistolen inne på rommet, fortel han og bryt ut i latter.