Etter at det ikkje lengre vart mogleg å fornye pass og ID-kort på lokale politistasjonar i Norge har det «rullande pass- og ID-kontoret» til politiet med base i Bergen reist jamt og trutt på turné på Vestlandet. 

I februar kjem det til både Høyanger og Hyllestad, og tenestestadsleiar for politiet i Høyanger, Kristoffer Jorddal Lønning, seier at det framleis er mogleg å bestille timar hos «passbussen» når den om litt vil parkere utanfor politistasjonen i Høyanger.

– Det har pleid å vere stor pågang på det mobile pass- og ID-kontoret når det har vore her. Normalt har bussen vore i Høyanger i to - tre dagar, men no har det blitt utvida til ein femdagars stopp hos oss så alle som ønsker å fornye identitetsdokumenta sine no på nyåret kan få gjort det.

Den største pågangen på fornying av pass og ID-kort er typisk på våren når sommarferien og utanlandsturar nærmar seg.

– Om ein har planar om å reise utanlands i år kan det vere lurt å ordne med dette alt no. Mi oppfordring er å nytte høvet når det mobile pass- og ID-kontoret først er her, så er det gjort, og så slepp du køar og stress når det byrjar å haste med å få papira i orden.

Praktisk tilbod

Til kvardags er det for dei fleste i ytre Sogn Førde politistasjon som er det næraste alternativet om ein skal ordne med nye identitetsdokument. Ein må bestille time om ein skal søke om eller fornye pass og ID-kort også der, og i dei periodane kor det er størst pågang kan det vere få timar å velje blant, og dei som er tilgjengelege kan vere langt fram i tid.

– Det kan komme brått på at ein ikkje nødvendigvis kan få ordna dette på direkten, og for nokre kan det halde hardt å rekke avreisetidspunktet om ein ikkje er ute i god nok tid med timebestillinga. Om ein tek dette alt no unngår ein alt av stress og bekymringar. 

Lønning håpar innbyggjarane i nærområdet set pris på moglegheita til å få ordna pass og ID-kort lokalt, og at tilbodet blir nytta. 

– For mange er det langt meir praktisk å stikke innom «passbussen» ein tur enn å måtte bruke fleire timar på å reise til Førde. Så om du skal søke om eller fornye pass eller ID-kort i år håpar eg du vurderer å gjere det her. Da kan vi oppretthalde eit godt og tilgjengeleg tilbod som alle kan nytte seg av, også dei som har vanskar med å komme seg til Førde mellom kl. 09:00 og 15:00 på kvardagar.

Nyttig kontaktpunkt

Lønning har sjølv hjelpt mange som har vore innom politistasjonen i Høyanger med nye pass i tidlegare tider da ein kunne få ordna slikt der, og for tenestestadsleiaren hadde det ikkje gjort noko om det hadde vore mogleg også no. 

– Vi likar jo å hjelpe folk, og det var alltid triveleg når folk stakk innom for å ordne med passa sine. Det var og eit nyttig kontaktpunkt mellom oss i politiet og innbyggarane, for vi fekk greie på ein god del under  småpraten som gjerne oppstod i den tida det tok å få ordna med papirarbeidet.