Mange som køyrer båt mellom Ortnevik og Nordeide har nytta ferjekort for å få 50% avslag på billettane sine for bil, men frå og med 1. januar i år er det ikkje lengre mogleg å betale med slike ferjekort for køyretøy på strekningane Vik–Ortnevik–Måren–Nordeide–Høyanger.

No blir det jobba med å få på plass kjennemerkeregistrering for bilar ombord på MS «Lysefjord», men før den løysinga er installert vil alle som har med bil ifølge Controller Øyvind Horgen i Skyttel – som er selskapet som har utvikla løysingane bak AutoPASS for ferje – få halv pris på billetten. 

– Alle kundar vil i ein overgangsperiode få 50% rabatt på bilar, noko som tilsvarar forskotsavtale med AutoPASS for ferje. Inntil ny billettløysing er på plass må kundar betale for køyretøyet med bankkort eller kontantar om bord. Når den har blitt installert vil det bli brukt kjennemerke-registrering på sambanda, og kundar må da inngå ein avtale for å få rabattar.

Passasjerar utan bil kan heller ikkje betale med ferjekort no, men må løyse billett  gjennom Skyss-appen, i nettbutikk, eller ombord. Det har vore 17% rabatt på personbillettar kjøpt ved hjelp av ferjekort.

Rabatt på direkten

Horgen fortel at prisane i billettmaskinene ombord på mellom anna MS «Lysefjord» skal vere oppdaterte og at rabatten alt lagt inn, og det vil ikkje vere naudsynt å sende inn kvitteringar for tilbakebetaling eller liknande ordningar.

Og sjølv om ferjekorta ikkje lengre er mogleg å betale med, betyr ikkje det at pengar som har stått på dei har gått tapt.

– Forskotsinnbetalt beløp på avtalen med AutoPASS for ferje er knytt til sjølve avtalen, ikkje ferjekortet. Det ligg altså ingen saldo på kortet, og ein treng ikkje å returnere kortet. Når Skyss vil ta i bruk eit nytt billettsystem på desse sambanda vil kundar kunne avreknast sin AutoPASS for ferjeavtale og dermed framleis få rabattar for bilar på sambandet.