– Det er tidleg å snakke om ein tidshorisont, men vi set på gassen no, så eg har eit håp om å få sjå røyk i pipene alt no seinhaustes.

Det seier Petter Sortland etter at han sjølv meldte at Nyrstar ønsker å restarte fabrikken sin i Høyanger gjennom ei pressemelding.

Det er fleire ting som må på plass, men den største bøygen vil ifølge ordføraren truleg bli å få tak i nok kvalifisert arbeidskraft.

– Vi såg at det var 100 søkarar til 10 operatørstillingar da Hydro søkte etter folk til resirkuleringsanlegget sitt sommaren 2023, og det er ikkje heilt utenkeleg med ein tilsvarande pågang her. Høyanger har 110 år med industrihistorie, og dette vil bli attraktive og sikre arbeidsplassar midt i det grøne skiftet og midt i «Grøn region Vestland».

Sortland trur det vil vere mogleg å starte opp aktiviteten på fabrikken sjølv om ikkje alle tilsette er på plass.

– Da Nyrstar hadde aktivitet her før 2020 hadde dei fleire gode lokale samarbeidspartnarar som Bilfinger og Per A. Øren, og det kan kanskje vere mogleg å basere seg på litt fleksibel bruk av arbeidskraft som alt finst tilgjengeleg i Høyanger i ein oppstartsfase medan ein rekrutterer til dei siste stillingane som eventuelt måtte mangle.

Sortland omtalar det som svært trasig om restarten til Nyrstarfabrikken ikkje skulle bli ein realitet, og gir stor honnør til Tommy Ølmheim som ein sentral arkitekt bak det som no er i ferd med å skje.

– Eg er takknemleg for at vi har ressurspersonar som Tommy i systemet som har jobba godt og langsiktig opp mot Nyrstar og andre aktørar. Her har det blitt gjort ein viktig og god jobb.