Arvid «Abba» Fimreite har mang ein gong sett med uro opp i fjellsida mellom Hovdetunnelen og Kvernhaugtunnelen når han har køyrt forbi, og han plar å skynte seg så fort han kan på denne vegstrekka.

I dag fekk han oppleve grunnen til kvifor han er redd for dei bratte og steinfylte skråningane nedanfor fjellpartiet Ståpelen.

– Eg kom køyrande frå Høyangersida saman med kona mi og barnebarnet mitt Emily på 19 år. Da vi nærma oss Hovdetunnelen såg vi at det låg ein stein i køyrebana vår så vi bremsa opp, og plutseleg smelte det ei diger steinblokk ned i vegen framfor oss i motsett køyrebane. Så kom det ei støvsky etter.

Fimreite sette umiddelbart på naudblinken og byrja å rygge bakover i feil køyrefelt. Han traff raskt på ein annan bil, og saman rygga dei om lag 400 meter til innkøyringa til Kvernhaugtunnelen.

– Vi traff også på ein tredje bil på vegen. Vi snudde ved Kvernhaugtunnelen og køyrde gjennom den utan å treffe på andre. Da vi kom til avkøyringa ned til Sandvika stoppa vi der for å varsle andre som kom køyrande, og snakke saman om det som hadde skjedd.

Skremmande oppleving

Fimreite er framleis skjelven under telefonsamtalen med Ytre Sogn rundt kl. 16.

– Denne opplevinga gjekk inn på oss alle tre som sat i bilen. Det er vanskeleg å vite kor langt frå oss steinen som slo ned i vegbana var, men eg tippar om lag 30 meter. Det var litt rart for vi høyrde ingen lydar. Steinen kom ut av det blå, utan noko anna forvarsel enn den andre steinen som alt låg i vegen. Men vi fekk med oss at det ikkje var andre bilar eller folk der før vi byrja å rygge tilbake mot Kvernhaugtunnelen.

Fimreite kom seg til slutt trygt heim til den mørklagde leilegheita i Hjetlandsbakkane i Høyanger, der straumen hadde gått som følge av raset.

– Vi hadde oss ein tur ned på kaien i Høyanger før vi køyrde heim for å sjå på raset frå avstand. Det var nokre ordentleg store steinar som kom ned, og det var veldig skremmande å oppleve raset på nært hald.