Julie Einen er primus motor bak Hyllestad-festivalen «Sommargry» og dagleg leiar for frivillegheitssentralen som styrer BUA Hyllestad, og var jublande glad for pengegåva som Sparebankstiftinga Sogn og Fjordane kom med.

Sommargry og BUA

– Dette gjer det mogleg for oss å stable på beina ein ny «Sommargry-festival» til sommaren. I år hadde vi innpå 400 personar innom festival-laurdagen trass i plaskande regnvêr, og ser at denne andre helga i juni kan bli etablert som ei flott Hyllestad-helg. Vi treng ikkje alltid reise til andre, no kan folk frå andre kommunar komme til oss, smiler Julie Einen i samband med at banksjefane Torunn Mattson og Trond Valaker i SpareBank 1 Sogn og Fjordane overrekte gåvesjekkane på 50 000 kroner til «Sommargry» og 75 000 kroner til BUA Hyllestad.

– Vi opna BUA i fjor haust, og no kan vi med denne gåva frå Sparebankstiftinga supplere med nytt utstyr. Det er ikkje alle som har alt av friluftsutstyr, så det er fantastisk at stadig fleire oppdagar oss og kjem hit for å låne, seier Julie Einen.

Leirduekastar

På same tid fekk Jan Løland, som er fagleiar i fiskeutvalet i Hyllestad Jakt og Fiskelag, overrekt ein gåvesjekk på 50 000 kroner.

– Dette er fantastisk, og no kan vi gå til innkjøp av ny leirduekastar på skytebana. Vi har auka rekruttering i klubben etter at jakt og fiskelaget fekk på plass skyte-simulatoren i Hyllestadhallen. Dette medfører at stadig fleire vil prøve seg på «skikkeleg» skyting også, smiler Løland, og har skytebana på Øveråshøgda i tankane.