På studie-huben på Fundo i Høyanger står kontorplassar klare og ledige der ivrige unge kan komme og arbeide. Tilbodet er gratis, og ideen fekk ho frå ungdomen sjølv.

– Eg var ein tur til Bergen og møtte fleire utflytta Høyangeringar som fortalte at dei var midt i eksamensperioden sin no. Det fekk meg til å tenke over korleis vi kan tilretteleggje for at dei kan sitje her på heimstaden sin og jobbe med å skrive, lese og gjere oppgåver. Vi har jo kontorplassar, både i kontorlandskap og singelkontor, i tillegg til møterom og kantine som ein kan sitje i, fortel Drage.

Kan vinne billett

Og tilbodet er ikkje berre for studentar. Om ein ser at julevasken er i gong heime, er det fullt mogleg å rømme på heimekontor til huben. 

– Vi tenker også at dette kan vere ein fin plass å sitje om ein har heimekontor, og treng litt fred og ro i juletida. Eg tok ein telefon til Lavik Kro, Østerbø Solutions og Osland Brygge, og spurte om det var mogleg å ha slike plassar ein kan sitje der og, og dei sa ja med ein gong. Så det er ikkje berre unge i Høyanger sentrum som kan nytte seg av dette tilbodet.

Om ein tek turen innom før jul er ein med i trekninga på inngangsbillett til Joss i jula. Denne er det Høyanger Næringsutvikling (HNU) som har sponsa.

– Tilbodet er sjølvsagt gratis, og responsen har vore god allereie. I det vi kom ut med dette heiv HNU seg på ballen og sa dei ville sponse ein inngangsbillett til Julerock på Joss 26. desember. Alle som besøkjer og registrera seg i utdanningshuben frå 1.-23. desember er med i trekninga av denne billetten.

Vise kva bygda har å by på

Drage håpar at dei unge kan vere med på å vise kva bygda har å by på. Midt oppi eksamensstress er det viktig å ta seg kaffipausar, få frisk luft og nytte tilboda ein har her i lokalsamfunnet.

– Vi håper at unge vil vere med på å vise fram dei positive sidene med bygda si, og håper at studentar og unge vil dele bilde frå eksamensskriving, kaffipausar, fjellturar og alt anna ein kan gjere rundt her i kommunen. Det er viktig å vise at vi har tilbod, til og med for dei som nett er heimom på ferie.

No håpar Drage at initiativet kan gjere til at studentar og unge vil nytte huben som ein møteplass der dei kan møtest og arbeide saman.

– Målet vårt er at dette kan bli ein naturleg møteplass for dei unge, der ein kan sitje og jobbe ilag, dele idear, og prate saman. Vi håper at dette blir ein plass der ein kjem og kan gjere mykje forskjellig, alt frå å studere, til å sitje på heimekontor, til å samlast saman, eller ha møter. 

Drage og kollegaene hennar i Studiesenter Kysten har liknande hubar rundt om i Sogn og Fjordane, så det er ikkje berre unge i Høyanger kommune som kan nytte seg av dette tilbodet.

– Det er fleire kommunar som held på med det same, og vi har liknande tilbod i fleire av kommunane her i Sogn og Fjordane. Måløy, Florø, Dale, Høyanger, Leirvik og Sollund har studie-hubar der ein kan sitje på ein kontorplass, låne møterom, bruke mingleområde og kjøkkenkrok. Vi håpar at enda fleire unge vil komme innom oss no før jul, smilar Drage.