I ausande regn møte Ytre Sogn ein entusiastisk flokk på veg til Austreimsfjøra. Første- og andreklassingane vart passa godt på av dei eldre elevane frå 6. og 7. klasse. Det mangla ikkje på humør og pågangsmot, trass det våte vêret. Dei yngste elevane fekk på seg redningsvestar. Kommunen hadde sytt for arbeidshanskar og plastsekkar til alle. 

Reingjering frå ovan

På ein av dei mest nedbørstunge dagane denne hausten vart opplevinga med aksjonen «Rein fjord» ei oppleving der det ikkje vart spart på vatnet. Dette til tross var det ingen sure miner å sjå. Mellom klissvåt tang og blanke fjøresteinar fann skuleborna ein del plast. 

Vi spurde førsteklassingen Krisander Kolsrud kva han skulle gjere denne dagen: 

– Eg skal plukke opp bosset etter andre, var det kontante svaret.

Krisander tykkjer ikkje det er greitt å kaste boss i naturen, noko han sjølv ikkje gjer. 

Lite å finne

3. – 5. klasse var i Krokasanden utanfor kyrkja, leia av lærar Lidun Ljotebø. Dei fann berre 3kg plastavfall, sjølv om dei brukte jarnrive til å rote og leite med godt nedi sanden. 

– Det er jo nesten ingenting å finne, klaga nokre elevar. Eg måtte forklare at det måtte vi vere veldig glade for, fortalte ein smilande lærar.

God stemning

Rektor Linda Sagerøy Solaas sa at dagen hadde gått bra, trass alt. 

– Vi plukka ein del plastsøppel, men kom ikkje heilt i mål på grunn av vêret. Ungane såg ut til å kose seg uansett, sidan det vart eit avbrekk frå den vanlege skuledagen. Å kome attende til skulen, få av seg våte kle, og bli servert varm kakao og nysteikte bollar, var svært populært, fortalde rektoren. 

Ho fortalde vidare at skulen planlegg ein ny tur seinare når vêret har blitt betre. Da vil dei ha det som fysisk aktivitet, ete lunsjen ute, og vidareføre arbeidet dei starta på.