Det finst ei lita gruppe med tøffe damer i Høyanger som kallar seg for Høyanger badenymfeforening, og dei har denne hausten organisert felles fjordbading  på Skjeggestranda minst ein gong i veka. I år hadde dei lyst til å få fleire med på eit julebad, og oppfordra folk til møte opp julaftan kl. 12.

– Det er Lars Petter Presthaug i Høyanger Båtforening som foreslo ovanfor oss nymfene å invitere andre med på fjordbadinga julaftan inspirert av den årlege tradisjonen på Søreide der innbyggjarar frå heile Høyanger sørside samlar seg for å ta eit julebad saman.

Det fortel ei av badenymfene, Kristine Brix Longfellow. Ho la ut ei oppfordring på Facebook om å bli med på den kalde opplevinga, og hadde håpt på eit oppmøte som kunne matche den på Søreide. Men det skulle vise seg at sørsidingane framleis er kongane i Høyanger når det kjem til julebading.

«Redda» av danskane

Ein familie frå Danmark på julebesøk i Høyanger stilte mannsterke opp, men sett vekk frå dei og ei og anna av badenymfene sjølv var det ikkje så mange andre i Høyanger som tok utfordringa på strak arm.

– Det er forståeleg at det kan bli litt vel hardt å kaste seg ut i fjorden 24. desember om ein ikkje har hatt ei gradvis tilvenning til vinterbading gjennom hausten.

Longfellow forsikrar om at vinterbading gir mykje tilbake til våghalsane, og at det eigentleg er snakk om velvære, sjølv om det kanskje ikkje kjennes sånn ut akkurat i det kroppen møter vintervatnet.

– Om bading i låge temperaturar har ein helseeffekt er omdiskutert, men det finst andre effektar som er udiskutable. Dette er meistring og glede, og det gir eit endorfin- og adrinalinrush som varar heile resten av dagen. Vi i badenymfeforeininga spør oss sjølv kvar gong kvifor vi utset oss for denne pina, men vi landar alltid på at det er verdt det når vi kjenner kor oppkvikkande det er med eit vinterbad.