Høyanger sanitetsforening har lang tradisjon for å arrangere samlingar 8. mars med eit særleg fokus på kvinnehelse, og i fjor hadde også Høyanger Arbeidarparti eit ønske om å gjere noko ut av denne merkedagen. Men i staden for å lage eit konkurrerande arrangement hengte lokallaget i Arbeidarpartiet seg heller på saniteten sitt opplegg, noko som viste seg å bli ein god kombo både med tanke på innhaldet i arrangementet og oppmøtet.
– I fjor møtte det oppunder 70 personar på samlinga, og det blir spanande å sjå om vi får eit like godt oppmøte i år. Arrangementet blir i år på Eides Hotel og er ope for alle, men dei som vil ha tapas i etterkant av det faglege må melde seg på.
Lokalt og nasjonalt
Som alltid vil det bli ein appell frå saniteten si side på arrangementet, og så har Ap-gjengen klart å lokke Kamzy Gunaratnam, som er medlem av helse- og omsorgskomitéen på Stortinget, til Høyanger for å tale til forsamlinga.
– Gunaratnam er kjent for å vere ein god talar som er lett å høyre på, og ho har og mange hjertesaker som er høgst relevante på kvinnedagen, så vi er veldig glade for at ho har takka ja til å komme til oss, seier lokallagsleiar Kristin Sagerøy Råsberg.
I fjor gjorde vidaregåandeelevane Jenny Østerbø Breidvik og Emma Finden Tennefoss stort inntrykk under kvinnedagssamlinga på Øren Hotel med sitt innlegg om korleis det er å vekse opp som unge kvinner i dag. I år vil det også bli to unge kvinner på talarstolen, om enn litt eldre enn dei som var med sist.
– I år blir det Agnete Hjelmeland Ørnehaug og Karen Oppedal Vevle som kjem for å snakke om korleis dei ser på sitt lokalsamfunn, og om kva som er viktig for dei her i Høyanger.
