For omlag ein månad sidan gjekk russen i Høyanger ut i Ytre Sogn for å høyre om det var nokon som kunne stille med ein teltplass til dei, slik at dei kunne få ein felles samlingsstad under russetida.
Då byrja ballen å rulle, og onsdag ettermiddag kunne dei endeleg etablere russeleiren sin like ved utestasjonen til Høyanger kommune på Dale. – Rektoren vår Kristin Sagerøy Råsberg, som også er leiar for Arbeidarpartiet Høyanger og kommunestyremedlem, tok tak i saka og forhøyrte seg om kva som var mogleg å få til. Det viste seg at kommunen kunne stille med dette området, og Kristin kom også i prat med Gaute Pedersen Haugen som kunne hjelpe oss med telt. Det fortel russen med russepresident Jenny Østerbø Breidvik i spissen midt i arbeidet med å sette opp gjerde og telt onsdag. – Vi er kjempetakknemlege ovanfor dei som har hjelpt oss med å få ein eigen plass å vere no den siste veka fram mot 17. mai. Det er heilt perfekt å vere her, for området ligg ganske skjerma til samstundes som det ikkje er for langt unna sentrum.
Travel russetid
Dei to telta som russen no nyttar seg av tilhøyrer foreininga Gøyanger, som stod bak arrangementet med same namn fram til og med 2018. Gjerda som står rundt området er det Per A. Øren som har lånt ut. – Det er veldig fint at vi kan få avslutte russetida saman. Med både raud- og svartruss er vi vel 29 til saman, så vi er alt for mange til å kunne samlast heime hos nokon.
