I Høyanger kommune finst det ei handfull råd som møtest fast for å diskutere relevante saker og utforme uttalar som blir presentert for administrasjonen og dei folkevalde. Eit av desse er ungdomsrådet. Det består av representantar frå alle skulane i kommunen, og nyvald leiar der er Helene Longfellow. Ho er til dagleg elev på Høyanger vidaregåande skule, og ho var også leiar av rådet i fjor.

– Eg synest at det er både flott og viktig at vi yngre har ei stemme opp mot dei som bestemmer her i kommunen i saker som angår oss. På førre møte diskuterte vi for eksempel dette med mobilar i skulen, som er eit aktuelt tema. Her i kommunen er det ulik praksis rundt dette på dei ulike skulane, og vår melding til politikarane her er at vi meiner det bør vere felles retningslinjer og felles praksis for dette for alle skulane i Høyanger.

Eit anna spørsmål som opptek Ungdomsrådet og Longfellow er studietilbodet ved Høyanger vgs.

– Eg meiner at det er veldig kjedeleg om det ikkje skal vere mogleg å gå studiespesialiserande i Høyanger i framtida, og eg synest og at det er uheldig at helsefag forsvant frå skulen dette studieåret. Eg har sjølv vener som måtte fortsette studieløpet sitt i Førde, og som har opplevd utfordringar med det. Det er tøft å plutseleg måtte flytte på hybel når ein ikkje har vore mentalt førebudd på det, og mange slit og med å finne seg til rette i Førde, og opplever eit ekskluderande miljø som står i sterk kontrast til korleis vi har det på skulen vår her.

Lærerikt

Longfellow fortel at det er spanande å få vere med på utforminga av det som kan bli vedteken politikk i heimkommunen, og at det er lærerikt å få innsikt i korleis dei ulike kommunale prosessane føregår.

– Vi har typisk tre møter kvar haust og kvar vår enten fysisk eller via Teams, og der diskuterer vi det vi sjølv ønsker og det Kristina Skogly – som er den i kommunen som har ansvaret for oss – tek med til rådet.

Og det er ikkje berre i Ungdomsrådet at Longfellow har engasjert seg. Ho er opptatt av rettane og vilkåra til elevar og studentar generelt, og var i fjor også på årsmøtet i Elevorganisasjonen i Oslo saman med Ariana Hjelmeland Rasdal, som den gong var elevrådsleiar på Høyanger vgs., og som og har vore ungdomsrådsleiar i Høyanger tidlegare.

– Det var nesten sjokkerande å vere med på, for korleis dei har det på andre og gjerne større skular i landet skil seg veldig frå korleis vi har det her. Det var veldig nyttig å få den erfaringa da det gav nye perspektiv til vår skulekvardag, som er prega av mindre forhold og tettare relasjonar mellom elevane og lærarane.

Invadert av ein «utlending»

At Helene Longfellow er både samfunnsengasjert og har eit reflektert syn på spørsmål som angår dei unge i Høyanger er eit uomtvisteleg faktum, men partipolitikk er noko ho har halde seg unna så langt.

Og det er det ein god grunn til, for ho har nemleg ikkje norsk statsborgarskap og vil ikkje kunne stemme når den tid kjem, så ho har ikkje brukt tid på å sette seg skikkeleg inn i kva dei ulike partia står for.

– Eg har budd i Høyanger heile livet, men har dansk og amerikansk statsborgarskap, så sånn sett kan du seie at ungdomsrådet vårt no blir leia av ein «utlending». På sikt kjem eg heilt sikkert til å sette meg meir inn i partipolitiske spørsmål og, men det er meir enn nok å engasjere seg i og meine om innanfor skule- og elevspørsmål, så per i dag held eg meg til det.

Longfellow skulle ønske at fleire unge engasjerte seg meir i samfunnsspørsmål, og meiner at dei vaksne også må ta ein del av ansvaret for at relativt få av dei yngre set seg inn i og meinar noko om samfunnet dei lever i.

– Eg trur ein del har gitt litt opp og føler at det ikkje utgjer nokon forskjell om dei uttrykker seg da dei ikkje blir lytta til. Det er dumt da nyttige perspektiv frå oss som faktisk er unge kan gå tapt, så det er viktig at dei vaksne hører på kva vi har å seie til dei.