Sparebanken Vest hadde med seg ti sjekkar som dei delte ut under sitt eige Hjartebank-arrangement i Førde tysdag kveld. To av desse gjekk til mottakarar frå Høyanger, og den som fekk mest var Høyanger Ungdomslag.

– Pengane skal gå til utbyting av undertaket til skifertaket som er på Valhall. Vi har alt gjort dette på taket som er over scena, og der kom prislappen på 300 000 kroner.

Det seier Gunn Marie Haugen i Høyanger Ungdomslag, som eig og driftar det gamle og ærverdige forsamlingslokalet.

– Sjølv om vi kan bruke opp igjen skiferen vår så er dette svært kostbart. Det er tungt arbeid, og det tek fagfolk ein time å utføre per kvadratmeter. Da blir det dyrt når eit heilt tak skal bytast.

Sjølv om Høyanger Ungdomslag  fekk 135 000 kroner, noko som var den største summen som vart utdelt tysdag, er det derfor langt igjen før det naudsynte vedlikehaldet er fullfinansiert. Men desse midlane kjem definitivt godt med, og Haugen er glad for å ha fått Sparebanken Vest med på laget.

– Vi har ikkje sett at det er nokon frist for å bruke tildelinga, så dei går nok inn i potten, og så vil vi jobbe med å finne andre finansieringskjelder. Dei eksisterer nok, så vi skal ta oss ein runde for å finne  andre ordningar som vi kan søke på. For oss er det sjølvsagt viktig å ha eit tak som er tett slik at dei unike veggmåleria som er i Valhall, og interiøret og bygget i seg sjølv, ikkje får fuktskadar.

Nye bårer til Røde Kors

Høyanger Røde Kors fekk også ein sjekk på 80 000 kroner. Den skal gå til finansiering av to bårer med hjul, der ei skal vere i Høyanger, og ei skal vere heimehøyrande i Vadheim.

– Det har kome nokre nye bårer på marknaden med hjul til bruk ute i terrenget som vi har hatt eit ønske dei siste åra om å kjøpe inn. 

Det melder ein takksam Gaute Haugen i Høyanger Røde Kors, dagen derpå.

– Det er tungt å bære skadde på bårer over store avstandar ute i terrenget, så dette vil bli ei solid oppgradering for oss. Dei vil nok ikkje bli brukt kvar dag,  men dei dagane der det blir bruk for dei vil det vere veldig nyttig å ha dei tilgjengeleg.

Godt utstyr er viktig å ha når ein skal gjere ein jobb, og når jobben handlar om liv og helse blir det ikkje akkurat mindre viktig.

– Det er eit sentralt prinsipp i Røde Kors at vi skal ha godt utstyr å hjelpe oss med. Det gjer det kjekkare å vere med i hjelpekorpset, og det gjer oss betre i stand til å handtere situasjonar som oppstår der folk treng hjelp på ein god måte.

Dei aktuelle bårene kostar ifølge Haugen omlag 100 000 kroner kvar. Det trengst derfor litt meir pengar før dei kan kjøpast inn, men det seier Haugen at skal gå heilt fint.

– Vi har eit styrevedtak på at desse skal kjøpast, så det blir dei. Vi dekker sjølv det som gjenstår før fullfinansiering.