Det er Rønnaug Meek og Kjell-Arve Kvamme som er primus motorar bak den frivillige organisasjonen Jul for Deg, og radarparet kan no – når juleteet har blitt kasta på dør og julematen er fortært – melde at den felles julefeiringa denne jula vart minst like koseleg som sist.

– Denne jula kom det omlag 65 gjestar mot omlag 45 sist. Det er hovudsakleg flyktningar som deltek på denne feiringa, og auken i talet på gjestar heng nok saman med at det og har blitt fleire flyktningar i Høyanger i løpet av 2024.

Jul for Deg har funne ein velfungerande modell for arrangementet sitt, som i år gjekk frå klokka 12 til 15 julaftan.

– Vi starta feiringa med å servere kjempegod tradisjonell norsk julemat levert av kommunen sitt sentralkjøkken. Så var det gang rundt juletreet og aktivitetar før det heile vart avslutta med dessert og kaffi.

Og sjølv om det var både norsk mat og norske julesongar på menyen, så vart det og meir internasjonale innslag under feiringa.

– Det var ein som under gangen rundt juletreet foreslo at vi skulle danse fugledansen. Den kan alle uansett kva land ein kjem frå, så da vart det ein god runde med den også. Det var i det heile fantastisk moro og kjempegod stemning frå start til slutt.

Takksame gjestar

Og om ein skal tru tilbakemeldingane frå gjestane som deltok blir det frivillige initiativet sett stor pris på.

– Mange er svært takksame for at det blir lagt til rette for ei slik felles feiring, og det var og nokre som tok med seg ukrainsk julebakst fordi dei ønska å bidra. Det var og ei som hadde laga flotte julekort med ein veldig koseleg tekst som ho gav til kvar og ein av dei frivillige saman med ei lita gåve. Det var veldig rørande.

Meek og Kvamme listar opp fire faktorar som må på plass for å kunne gjennomføre ei slik julefeiring.

– Vi må ha sponsorar, frivillige som hjelper til, eit lokale å vere i, og så må det komme gjestar. Her kan vi ikkje få takka frivilliggjengen nok, men og Høyanger vidaregåande skule fortener stor takk for å nok ein gong vere ein fantastisk samarbeidspartnar. Det er berre ja, ja, ja heile vegen.

Meek og Kvamme takkar og Extra Høyanger, Kiwi Høyanger, Joker Kyrkjebø, Naustdal Dampbakeri, Hydro, Vestland fylkeskommune og Høyanger kommune for god støtte, samt Svein Olav Aardal for å ha overført «Jul for Deg»-trykk på nokre julete forkle som dei frivillige gjekk med.

– Vi har ingen inntekter så vi er heilt avhengige av sponsing og støtte for å kunne realisere feiringar som dette. No kjem vi til å bruke året vi har framfor oss til å skaffe finansiering til ei ny julefeiring, og tenke litt på om det er noko vi kan gjere for å gjere feiringa enda betre og meir attraktiv for både sponsorar og gjestar.

For er det ein ting Meek og Kvamme er krystallklare på, så er det at dei vil gjere det dei kan for å kunne invitere til gjestebud 24. desember også i år.

– Så lenge nokon vil komme, så skal vi lage til julefeiring!