I kva grad er ein kulturskule viktig? Kva er vel ei lærarstilling der til eller frå for kommunen og vi som bur her? Eg vil påstå at det betyr mykje!
For meg har kulturskulen vore viktig heile livet. Den har hatt stor innverknad på barne- og ungdomstida, val av utdanning og yrke og kvar eg har busett meg. Grunnlaget for dei fleste av mine fritidsaktivitetar i dag, samt kva eg jobbar med, vart lagt i musikkskulen i Høyanger der eg hadde gode lærarar. Å få åleinetid med ein lærar, å bli sett, høyrt og verdsett kvar veke, er unikt og noko ein ikkje finn andre stader! Samstundes høyrte eg til eit musikalsk fellesskap der eg og dei andre fekk trening på å stå framfor eit publikum og prestere noko. Den meistringskjensla er unik. Å klare å spele med to hender samstundes på pianoet, der alle ti fingrar skal treffe rett tangent på rett tid og ligg der akkurat så lenge som den skal, er ikkje lett for nervøse born! Denne treninga på å takle nervar og prestasjonsangst har vore viktig mange gonger, både privat og i arbeidslivet. Deltaking i korps har gitt meg mange opplevingar og nye venner over heile landet. Utan kulturskulen som stilte med dirigent, hadde det vore tungt å halde hjula i gong. Vi var mange som lærte samspel og kor viktig ein var sjølv med tredjestemme i Kyrkjebø skule- og ungdomskorps. Eg hugsar og med stor glede tida i det kommunale felleskorpset, både utvikling musikalsk sett, men og sosialt. Eg var stolt over å vere ein del av det og såg opp til dei eldre og røynde; å få vere ein del av fellesskapet. Når ein kom ut i verda, var det lett å finne ein fritidsaktivitet: korps. Korps er dei fleste stader og ein er alltid velkomen til å vere med uansett. Og mi erfaring, som mange andre si, er at ein alltid blir tatt vel imot. Det har vore mi erfaring, og er og mi dotter si erfaring, som og har hatt si musikkopplæring i kulturskule og korpset på Kyrkjebø. Fritidsaktivitetane mine er framleis musikk og korps. I dag er det Vadheim musikklag eg spelar i her, men Kyrkjebø skule- og ungdomskorps har framleis ein stor plass hjå meg. Poenget mitt er at innbyggjarar i kommunen fortener ein kulturskule som kan støtte opp om det arbeidet frivillige legg ned i tid og arbeid for å skape bulyst, glede, personleg utvikling for den einskilde, men og fellesskap. Støtt opp om kulturskulen og oppretthald stillingane vi har i dag! Lise BergeKyrkjebø
