– Vi har ei jente i bygda, Aud Dagrun Lassemo, som har erfaring med stolpejakt og som har besøkt fleire stadar som har slike løysingar. Ho tok det opp med oss i grendalaget om det kunne vere noko for Leirvik. Tilbakemeldinga frå oss var «berre sett i gong», og ho tok oss på ordet!
Det fortel Arne Dale i Leirvik Grendalag. Med god hjelp også frå andre lokale krefter, slik som «gutta på tur»-gjengen, som har teke seg av det praktiske, har det i seinare tid kome på plass 54 ulike stolpar i Leirvik og nærområda. – Måten dette fungerer på er at folk leitar etter desse stolpane og scannar dei med telefonen sin i appen Stolpejakten når dei finn dei. Så det er ei slags skattejakt dette, og liknar kanskje litt på Pokémon Go, som har vore veldig populært dei siste knappe ti åra. Måndag var det altså offisiell opning av ruta i Leirvik, og tradisjonen tru når det er noko som skal opnast der, så var det ordførar Kjell Eide som stod for opningsjobben. – Vi har hatt ein del aktivitet og prosjekt her i Leirvik dei seinare åra, mellom anna gjennom LivOGLyst-ordninga, så det har blitt litt ymse opningar og markeringar. Då pleier vi å invitere ordføraren som alltid stiller opp, så det har blitt ein fin tradisjon.![Slik ser stolpane ein kan finne i Leirvik ut. Dette er ein raud stolpe, noko som betyr at den høyrer heime i kategorien «medium vanskeleg».](https://cdn.ytresogn.no/bundles/global/uploads/articles/25/43963903714903363515643993165542370337003944n.10798.jpg)
![Som så mange gongar før når det kjem til å gjere ein jobb ute i felten i Leirvik er det «gutta på tur» som har gjort jobben med å sette ut kubbane. Frå venstre: Leif Dale, Håkon M Haukøy, Ove Dale, Bjarne Avedal, Anfinn Rønneseth, Gunnar Handal. Agnar Ås og Atle Wolff er ikkje med på bildet.](https://cdn.ytresogn.no/bundles/global/uploads/articles/25/image4.10801.jpeg)
Prøveprosjekt Stolpejakt har blitt ein populær aktivitet mange stadar, og Dale har stor tru på at det også vil bli mange fastbuande og tilreisande som ønsker å leite etter stolpar også i Leirvik. – Vi tek dette året som eit prøveprosjekt. Det er mange som har premieringa ut frå kor mange poeng ein klarer å samle, noko vi ikkje har enn så lenge. Men om det skulle vise seg at løysinga blir populær vil vi sjølvsagt vurderer å gjere meir ut av den. Vi vil få statistikk på aktiviteten i løypa vår, og vil etter kvart ta ei evaluering ut frå den.
![Det var ein ivrig gjeng som møtte på opninga av stolpejakta, og som no er klare til å leite etter dei 54 stolpane som er sett ut i nærområdet.](https://cdn.ytresogn.no/bundles/global/uploads/articles/25/image1.10800.jpeg)