- Rekruttering av sjukepleiarar, vernepleiarar og fastlegar er noko Hyllestad kommune har slitt med i lang tid. Men det gjeld ikkje berre for vår kommunen, men også kommunar i resten av landet, spesielt i distrikta, seier kommunedirektør Martin Lundgård til Ytre Sogn.
Kva som er forklaringa har han ikkje svar på, men fortel at dette er noko kommunen har jobba mykje med.
For Hyllestad har dette vore ei utfordring gjennom mange år, der kommunen gjennom vikarbyrå har hatt ei viss dekning av fagfolk i desse stillingane. -Dette er noko vi kontinuerleg jobbar med både på politisk og administrativt nivå, og med drahjelp både frå statleg hald ser på korleis vi skal innrette oss og klare dette. På landsbasis er det jo ein underdekning på sjukepleiarar,. I følgje NAV si bedriftsundersøking mangla 5600 sjukepleiarar i Norge i 2019, og det er spådd at det i 2035 vil kunne mangle 28 000. Så dette er eit problemområde der heile landet må dra i lag, påpeikar Lundgård. Jobbar vidare
Når det gjeld fysioterapistillinga som kommunen har lyst ut fortel kommunedirektøren at søkjartalet er bra. Arbeidet med stillingane som framleis står ledige vil halde fram for å nå ut til fleire søkjarar, til dei rette kandidatane er på plass. -Generelt i Hyllestad jobbast det med rekrutteringstiltak for innbyggjarane i form av mellom anna tilskot til dei som ønskjer å etablere seg og byggje hus her og rimelegare barnehage. Så ser vi blant anna på dei kommunane som til ein viss grad har lykkast, og tek lærdom av det. Men det skal og seiast at vi har mange dyktige medarbeidarar og sjukepleiarar i kommunen vår.