Spørsmålet om ei mellombels stenging av skulen i Vadheim har vore på den politiske dagsorden gjennom våren, og torsdag kom saka opp til endeleg handsaming under kommune­styremøtet i Høyanger. Saka har engasjert, og samtlege parti gjekk på talarstolen for å gje sitt syn på den. Kommune­direktør Ørjan Haram starta seansen med si orientering, og han understreka at saksutgreiinga frå administrasjonen si side har omhandla omsynet til barna sitt beste, og at sakshandsamingsprosessen har vore rask grunna retningslinjer i FN sin barnekonvensjon. Haram kom også inn på det sentrale spørsmålet om kor mange elevar det er, har vore, og skal bli til hausten i Vadheim.

– Det har vore mykje fram og tilbake knytt til tal på elevar. Eg vil sei at om det er 7, 9, 12 eller 15, så er utfordringa der likevel. Men per no er prognosa for elevtalet i Vadheim per 1. august 11 elevar. Og så veit vi at det kan komme fleire, eller det kan komme færre.

Lyttar til foreldra
Mange av representantane som var på talarstolen meinte at det er fleire aspekt ved sakshandsaminga som har vore problematisk og kritikkverdig, og at usikkerheit rundt faktiske forhold har komplisert saka yttarlegare. Nye innspel, sist i form av eit brev frå FAU (Foreldrenes arbeidsutval) ved Vadheim oppvekstsenter sendt måndag til alle parti, gjorde til at fleire av lokalpolitikarane gjekk i tenkeboksen. Både Arbeidarpartiet og Senterpartiet, som stemte for ei mellombels stenging av skulen ved oppvekstsenteret under formannskapsmøtet tysdag 6. juni, har sidan snudd.

Gruppeleiar Kristin Sagerøy Råsberg  for Arbeidarpartiet var ein av representantane som gjekk inn på at brevet for FAU hadde innverknad på deira vurderingar. 

– Ut frå innhaldet i brevet frå FAU kan det sjå ut som at elevar og føresette ikkje ønsker denne flyttinga, og dei skriv at prosessen ikkje har vore bra. Arbeidarpartiet må lytte til innbyggarane, og FAU er i så måte eit veldig viktig organ, nettopp fordi dei representerar foreldrene. 

Etter ein pause og eit kort møte mellom partia presenterte Hroar Holm Carlsen frå Høgre, som i møtet i utval for oppvekst 1. juni foreslo å halde skulen i Vadheim open også neste skuleår, eit felles framlegg i kommunestyresalen som vart einstemmig vedteke. Framlegget hadde følgande ordlyd:

”Kommunestyret vedtek å oppretthalde tilbodet ved Vadheim oppvekstsenter ved skulestart 2023/2024. Politiske saker som gjeld skulestruktur eller mellombels flytting av elevar skal som prinsipp leggast fram til handsaming minimum fem månadar før iverksetting.”

Letta FAU-leiar
Det var ein svært letta FAU-leiar Rebecca Ullebø ved Vadheim oppvekstsenter som gjekk ut av rådhuset etter at vedtaket var gjort av kommunestyret.

– Vi er veldig glade for at lokalpolitikarane våre har lest brevet vi sendte og tatt innhaldet der innover seg. At saka fekk eit einstemmig vedtak om å oppretthalde drifta ved skulen vår også neste skuleår er rett og slett kjempeflott.

Ullebø er glad for utfallet i saka, men ho er tydeleg på at sjølv om skulen no er redda, så er den ikkje trygg.

– Folke- og elevtalet er som det er, så her må det gjerast tiltak, og det for heile kommunen og ikkje berre Vadheim. Vi kom med mange gode innspel i vårt høyringsbrev som vi håpar kommunen kan ta fram igjen og sjå på, slik som gratis barnehage og SFO, og ei betre marknadsføring av heile Høyanger.