Mannen som mellom anna er mistenkt for to biltjuveri, samt køyring i rusa tilstand som enda i ei ulykke, er no varetektsfengsla.
Mannen stal ein bil natt til onsdag og enda ein bil søndag kveld. På søndag enda køyringa i ei ulykke og mannen vart sendt på sjukehus i Førde. Etter sjukehusopphaldet vart vedkommande sendt rett i varetekt. – Sogn og Fjordane tingrett beslutta at mannen som er mistenkt etter hendingane i Høyanger kommune skal bli varetektsfengsla i fire veker fram til 8. august. Denne perioden kan bli utvida etter kvart, men i første omgang er det snakk om fire veker. Mannen har samtykka til varetekt, seier politisjef i Høyanger Kristoffer Lønning. Mannen er mistenkt for å ha køyrt i rusa tilstand utan førarkort, i tillegg til tjuveri av bilane han har køyrt. Han er også mistenkt for å ha utløyst ein alarm i Høyangertunnelen, og for brot på vegtrafikklova § 3. – Mannen har erkjent samtlege forhold, seier Lønning. Han oppfordrar alle til å gjennomføre tiltak for å unngå at liknande situasjonar skal kunne oppstå ved seinare høve. – Eg vil tilrå alle å passe på å låse bilane sine og oppbevare nøklane andre stadar enn i nærleiken av bilen.