– Musikken min er klassisk musikk med inspirasjon frå filmmusikk, og tittelen «Vemod» beskriv godt stemninga ein får av å høyre albumet. Her er det samansette følelsar som tristheit, sorg, tap, sakn. Men også eitt snev av håp.
Fimreite er frå Hyllestad men har budd dei siste 17 åra i Bergen. Der har ho bygd sitt eige studio heime i sitt eige hus. – Eg komponerer, spelar og produserer all musikken min sjølv i mitt eige studio. Mannen min er medprodusent og står for miksing og mastring. Som tidlegare rocke-trommeslagar og låtskrivar ville eg ta steget vidare, og byrja derfor å komponere klassisk musikk. På «Vemod» er lydbiletet prega av instrument som piano, strykarar, blåsarar, perkusjon og kor som er sett saman i dyster harmoni. – Å sette saman ulike instrument til dystre melodiar er som terapi for meg. Inspirert av film– Inspirasjonen min kjem hovudsakleg frå filmmusikk der Hans Zimmer er det store førebiletet. Men klassisk musikk, progmetall, rock og utallige timar med TV-seriar er også inspirasjonskjelder. Men ideane treng og ein god dose med eigne følelsar og erfaringar i livet for å bli songar. Målet Fimreite har med musikken er å få fram følelsane i lyttaren, og den store draumen er å få lage musikk til bilete. – Filmmusikk har lenge vore ein fasinasjon for meg, og derfor bestemte eg meg for nokre år sidan å komponere eigen musikk. Men det tok ei stund før eg tok steget og ga ut min første EP «Einsam i frykta» i 2022. Singelen «Tunge tankar» og «Huldra» vart også gitt ut same året. I 2023 gav eg ut singelen «Trollskog». Fleire av mine tidlegare utgivelsar er med på dette albumet, men det er også nokre nye låtar. Musikken har blitt streama i mange land, og eg har fått nokre fans i både USA og Sør-Afrika.