Torsdag, 14. september kl. 12.00 starta bussen frå busstasjonen i Høyanger. 

Då vi forlot ferjekaien på Oppedal var det 36 forventningsfulle pensjonistar frå Kaupanger, Sogndal, Nessane, Høyanger, Kyrkjebø, Førde, Teigen, Norevikane, Lavik og Massnes på veg mot Bergen, der guiden vår Elisabeth Lothe Nervik venta på oss for å ta oss med på flyet til Paris.

Vi ankom hotellet vårt I Maisons Laffitte, nordvest for Paris, om kvelden.

Fredag 15. var det guida busstur i Paris. Vi plukka opp Evabeth som skulle vere guiden vår i Paris denne dagen. Evabeth er norsk, men har budd i Paris i 50 år, og ho losa oss vel fram til dei kjende stadane som Triumbogen, Eiffeltårnet, Louvre og Notre Dame. Etter ein stopp i Luxebourghagen gjekk turen via Champs Elysèes og til ein god lunsj på Cafè Kleber. Etter lunsj var det omlag 1 time til fri disposisjon i Paris.

Laurdag var fridag, og den kunne vi bruke slik vi ville. Mange vart med til slottet, Château de Maisons. Slottet var eit praktbygg. Det har vore mange eigarar av slottet, men i 1905 kjøpte den franske stat slottet. I si tid hadde kjende franskmenn som Napoleon, Ludvik 14., Ludvik 15., Voltaire og Lafayette vore gjester på slottet.

Sundag var det igjen klart for ei ny utflukt. Denne gongen gjekk turen til Normandie. Det var omlag 3 timar i buss frå hotellet der vi budde til vi nådde kysten av Normandie.

Igjen møtte vi guiden vår frå Paris, Evabeth. Ho fortalde om 2. verdskrig i Frankrike og ikkje minst om D-dagen 6. juni 1944.

Første stopp her var Hermanville og Place Courbet. Her kom styrkane frå England, Liverpool Regimet, i land. Også to norske båtar Svenner og Stord var med her.

Svenner vart senka, og 97 av dei over 100 om bord vart teken opp av ein annan båt. Ordren var full fart mot land, men båten som plukka opp dei norske fylgde ikkje denne ordren, og fekk med det plukka opp 97 norske sjøfolk. Kong Harald var her i 2004 og avduka eit minnesmerke, «Orlogsgast».

Etter dette gjekk turen til Arromanches. Her vart vi servert ein god lunsj på «Hotel de Normandie. Etterpå var det tid for å sjå seg om her, som hadde fleire minnesmerke etter D-dagen.

Vidare gjekk turen til den amerikanske kyrkjegarden i Normandie. Då vi ankom var det akkurat ei spesiell minnemarkering med amerikanske turistar der. Mellom anna vart den amerikanske nasjonalsongen spelt.

Då vi hadde sett oss omkring gjekk turen attende til Maisons Laffitte.
På heimvegen fortalde Evabeth om Frankrike i fortid og i nåtid. Ei kunnskaprik dame som «kunne» Frankrike godt. Prisane hadde også gått mykje opp i Frankrike, og det gav mange utfordringar. 

Mange var nok forundra over at prisnivået i Frankrike, som var på høgde med dei norske prisane. Billigaste bensin som vi registrerte på turen var 1,99 Euro, dvs. om lag 23 kr./l. Ein halvliter øl kosta på restaurant 9 Euro, tilsvarande 103 kroner.

Vel heime etter ein lang dag vart vi servert ein god middag på Restaurant Santa Monica. Vi hadde også middag på den same staden både fredag og laurdag.

Måndag var igjen fridag og til eige bruk. Nokre drog inn til Paris, andre rusla rundt I Maisons, og atter andre gjekk inn til ein naboby, Sartrouville.

Om kvelden hadde vi ein god middag med mykje moro og latter på Restaurant Zebra. Verten var ein artig kar, som tydeleg sette pris på besøk frå Noreg.

Tysdag var det tid for heimreise, med fly via Oslo til Bergen. Her tak vi farvel med guiden vår, Elisabeth, som hadde losa oss vel fram overalt, og hadde god skikk på oss, trass ein del utfordringar med frukostane på hotellet vårt.

Deretter tok bussen oss vel heim.

Ein takk til alle som var med og gjorde dette til ein fin tur. 

Også ein takk til guiden vår Elisabeth og arrangøren Dag Aasebø Reiser

Karl Magnus Gudvangen