Sjølv om vêret utanfor var både hustrig og vått vart førjulsstemninga inne i lokala på Nesse Oppvekstsenter, eller sambrukshuset som det og vert kalla, både varm og god.

– Det har gått med nokre timar for å få alt på plass til denne kvelden. Vi har dekka på bord til om lag 100 personar, så vi håpar at mange tek turen hit i kveld, seier Anders Tennefoss. Han sit saman med Ingun Merete Sande, Randi Sande, Gunn Linde og Sander Bakke Nesse i styret til Nesse Grendelag.

Mange gode hjelparar

Tennefoss legg til at ein på kor-kafèen denne første søndagen i advent kunne få kjøpt både kaffi, brus og gløgg, og velje mellom eit utval av gode kaker.

– Det har vore mange dugnadsfolk i sving som har baka til dette arrangementet, så vi stiller med eit velfylt kakebord med mange gode kaker.

Glad i jula

Tre av dei som var til stades på Nesse Oppvekstsenter denne kvelden var Hedda Kleiven og Silje Sande Grønsberg, som hadde med seg dottera Astrid på 1 år.

– Kvifor har dere teke turen hit i kveld?

– Vi er frå Nessane og har begge ei mor som er med og syng i KUL-koret. Og så tykkjer vi det er veldig koseleg å vere her og høyre julemusikk og få litt julestemning. Vi er veldig glade i jula, så det å delta på ulike arrangement i førjulstida er noko vi har gjort heilt frå vi var små, fortel dei.

På spørsmål om dei har andre juletradisjonar, svarar dei;

– Eg og ei venninne har hatt ein fast tradisjon i nokre år der vi møtast ein gong i løpet av desember og bakar serinakaker. Det er utruleg hyggeleg og sosialt, og så smakar det veldig godt, fortel Hedda og ler.

– Vi har planar om å bake og pynte peparkakehus saman med vesle Astrid neste helg, seier Silje med eit smil.

Blant dei frammøtte som var til stades på kor-kaféen var og 83 år gamle Erling Berge frå Kyrkjebø, som i si tid var med å starte opp koret i heimbygda.

– Det gler meg å sjå at KUL-koret held stand og har så mange medlemmar. Og dei let så flott!

Stemningsfull songkveld

Med korgjestane vel på plass på podiet var det berre å sette seg tilbake å nyte vakker toneklang og julesongar som fylte rommet. Her var songar som mellom anna «Det lyser i stille grender», «Gled deg du jord» og «Glade Jol».

– Tusen takk for invitasjonen hit til den austre delen av kommunen vår, der også nokre av songarane som er med i KUL-koret kjem ifrå.

I dag har koret medlemmar frå alle bygdene i Høyanger kommune, og det er utruleg kjekt. Det er også ekstra stas å ta turen hit til Nessane for fyrste gong for å syngje for- og med dei som er her i kveld, fortalde leiar Sissel Tove Litzheim publikum.

Ho la til at koret denne gongen kom utan sin faste dirigent Sjoerd Tolsma.

– Men vi er så heldige å ha ein super reserve i Sonja Aasen Årdal, som er med oss her i dag.

I tillegg til KUL-koret si framføring var det også ein musikalsk kveld der allsongen stod høgt, og publikum let seg ikkje be to gonger. Dei stemde i saman med koret på kjende kjære julesongar som «Musevisa», «Å jul med di glede» og «Fager er jordi», for å nemne nokre.

Mykje aktivitet

Ifølge styret i grendelaget er det mykje aktivitet i sambrukshuset på Nessane, også når det ikkje er kor-kafé der.

– Her er det ulike arrangement som blant anna juletrefest og bingo, og trim og linedance kvar veke. Nesse Skyttarlag har og eit flott skyteanlegg i kjellaren der dei har samling to gonger i veka, ei for dei unge, og ei for dei vaksne skyttarane.