Trioen Odd Erik Dingsøyr, Tor Egil Høyvik og Bjarte Johansen byr igjen på energisk, hard og rå musikk, inspirert av heimbygda Høyanger.
Det er knytt stor spenning til Høyanger-bandet Me and You Va-Va-Voom, som fredag 3.april slepp sitt andre album White awaits. Det inneheld åtte songar, og blir igjen gitt ut av plateselskapet Rob Mules Records. Sidan oppstarten i 2017 har bandet no gitt ut to singlar og to album. - Ved førre albumslepp hadde vi som mål om å produsere nok materiale til å halde ut ein heil kveld, og no nærmar vi oss noko, seier Tor Egil Høyvik lattermildt. Albumet har dei arbeidd med i eitt år, og endeleg skal publikum få høyre Høyanger-bandet sine nyaste låtar. - Utan å tenkje over det har vi nok endra oss noko uttrykksmessig. Frå å ha eit noko aggressivt uttrykk, har vi kanskje blitt noko rundare i kantane, seier vokalist og frontfigur Odd Erik Dingsøyr. Men som alltid, byr bandet på energisk, hard og rå musikk! - Mange band reindyrkar sin sjanger, men det gjer ikkje vi. Trioen er samde i at sjanger betyr lite. Dei er mest opptekne av å skape god musikk som dei sjølve likar. No som sist, handlar tekstane mykje om ski, natur og fjell. Med titlar som Ski arena og No snow, er det ikkje vanskeleg å forstå kor bandet hentar inspirasjon frå.