Leiar for frivilligsentralen, Julie Einen, fortalde førre veke til Ytre Sogn at dei gleda seg stort til å annonsere headlinaren sin til Sommargry-festivalen i sommar.

– Vi vil skilje oss litt frå mengda, og har ein veldig kul headlinar, kunne ho freiste med då, og festivalleiinga skuffa ikkje.

Det blir Hjerteslag frå Bergen som får æra av å avslutte laurdagskvelden i hagen til Prestegarden i Hyllestad. Bandet skapte seg eit namn i Bergen og Norge si musikkscene med debutalbumet «Møhlenpris Motell» i 2015, og har sidan gitt ut ytterlegare fire studioalbum.

Vokalist og frontmann Robert Eidevik skilte lag med dei fire andre i bandet i 2020, og har no samla kjende bergensmusikantar til ei ny besetning. Dei kom i 2022 med comeback-albumet «Tyvens Dagbok».

Bandet er kjend for gitarbasert og drivande rock, sterkt inspirert av Manchester-band frå 90-talet, som The Smiths og Stone Roses.

Hjerteslag har hausta gode kritikkar frå første album av, og er også anerkjent som eit spesielt godt liveband.