Med 134 færre heilt ledige enn i juni fjor har Sogn og Fjordane ei betre utvikling på arbeidsmarknaden enn på landsnivå. Både Høyanger, Balestrand, Solund og Hyllestad har nedgang.
– Mykje av nedgangen i arbeidsløysa skuldast at vi har fleire i tiltak enn på same tid i fjor og at det er færre permitterte, seier direktør for NAV Sogn og Fjordane, Tore Thorsnes. – Det overordna biletet er likevel at det går svært bra for næringslivet i fylket. Det ser vi mellom anna på at dei fleste næringar har ein reduksjon i arbeidsløysa. Det er særleg positivt at utviklinga innan viktige næringar som industri og bygg og anlegg er god, seier Thorsnes. I juni var det 910 personar i Sogn og Fjordane heilt utan arbeid. Dette er 134 færre enn i same månad i fjor. Med 1,6 prosent av arbeidsstyrken heilt utan arbeid, har vi lågast arbeidsløyse i landet. På landsnivå har arbeidsløysa auka med 3655 personar (5 prosent) frå juni i fjor. Det er no 80 965 heilt ledige, tilsvarande 2,9 prosent av arbeidsstyrken. Vestlandsfylka, med unnatak av Sogn og Fjordane, og Agder-fylka står for det meste av auken.Låg arbeidsløyse
14 kommunar i Sogn og Fjordane har reduksjon i arbeidsløysa i juni. Størst reduksjon har Vågsøy med 32 færre ledige enn på same tid i fjor og Stryn med 30 færre ledige. Åtte kommunar har ei arbeidsløyse på under éin prosent. Hornindal og Solund har lågast arbeidsløyse. Den høgaste arbeidsløysa finn vi i kystkommunane Selje (3,6 prosent) og Flora (3,2 prosent).Størst nedgang i arbeidsløysa er det innan industri og kontorarbeid, som har høvesvis 23 og 21 færre ledige enn i juni i fjor. Ingen næringar har ein auke på meir enn seks personar. Talet på ledige i Gulen er 14 (1,1 prosent), i Solund 3 (0,7 prosent), i Hyllestad 15 (2,1 prosent), i Høyanger 43 (2,1 prosent) og i Balestrand 5 (0,7 prosent).
Positivt for ungdom
Alle aldersgrupper har reduksjon i arbeidsløysa frå juni i fjor, men utviklinga er best i gruppa under 30 år. Denne gruppa har ein reduksjon 21 prosent, mot 9 prosent i gruppa over 30 år.Talet på heilt ledige innvandrarar frå ikkje-vestlege land er redusert med 52 personar frå juni i fjor. Dette svarar til ein reduksjon på 24 prosent. Innvandrarar frå vestlege land, som stort sett er arbeidsinnvandrarar, har ein reduksjon på 8 prosent. Etnisk norske ledige har ein reduksjon på 10 prosent. – Både ungdom og innvandrarar er høgt prioriterte grupper hjå NAV, så det er positivt at vi lukkast med å få mange i disse gruppene i arbeid eller aktivitet, seier Thorsnes.
