– Det er ein utruleg gjev pris å få, seier Ingvar Linde om å bli kåra til Årets kommunaløkonom i 2020.
Han er til vanleg økonomisjef i Høyanger kommune. Tysdag ettermiddag greidde rådmann Kjellaug Brekkhus og personalsjef Arnvid Hovland å lure han inn på eit møterom på rådhuset. – Dei spurde om eg kunne vere med på eit møte etter arbeidstid. Då eg kom inn på møterommet såg eg generalsekretæren i NKK (Norges kemner- og kommuneøkonomers forbund, red.mrk) på storskjermen. Då skjønte eg kva som skjedde, og det var ei veldig hyggjeleg overrasking. Det er ei stor ære, seier Linde. Han er den første i Høyanger kommune som får den gjeve prisen. – Vanlegvis blir prisen delt ut på årsmøtet, men grunna covid-19 skjedde det på nettet i år, fortel Linde, som er frå Nessane. Han jobba tidlegare i Sogn og Fjordane Revisjon IKS, og hadde ansvar for revisjonen i fleire av kommunane i Sogn. Ein av desse kommune var Vik. Linde åtvara då om det som la grunnlaget for den såkalla Terra-saka, noko som i ettertid har gitt han positive omtalar.