Det gjeld både Høyanger, Gulen og Hyllestad, viser dei siste tala frå NAV Vestland, som vart lagt fram tidlegare i dag. 

I Høyanger er arbeidsløysa på 4,4 prosent, eller 90 heilt ledige, ved utgangen av januar. Det er ein auke på 61 prosent i høve til same tid i fjor.

Hyllestad har ei arbeidsløyse på 3,3 prosent, eller 23 heilt ledige. Det er ein auke på 92 prosent i høve til same tid i fjor.

Både Gulen og Solund har ei arbeidsløyse på 1,9 prosent. Når det gjeld Solund, der talet på heilt ledige er 8, er det uenadra i høve til same tid i fjor. 

For Gulen er det imidlertid ein auke på 44 prosent. Der er talet på heilt ledige no 23.

Aurland er imidlertid kommunen i Vestland med høgast arbeidsløyse ved utgangen av januar, på 9,5 prosent, eller 94 heilt ledige.

Ser lysere ut
I januar er om lag 13.400 personar registrerte som heilt ledige i Vestland, som  er ein auke på vel 1000 personar frå desember. Arbeidsløysa i fylket er no på 3,9 prosent.

Trass auka i talet på ledige ser situasjonen lysare ut framover,

– Dei økonomiske indikatorane peikar mot at 2021 vert eit år med vekst, kor ein del av det ein tapte i 2020 vert henta inn att. Vi venter at talet på ledige går ned med rundt 33 prosent i år, seier direktør i NAV Vestland, Anne Kverneland Bogsnes.

Ho legg til at prognosen legg til grunn at samfunnet ikkje vert stengt ned på nytt, og at dei fleste restriksjonane i samband med koronapandemien etter kvart vert letta.

Meir utdanning
I januar er det over 6.000 ledige stillingar i Vestland. Sjølv om mange ledige etter kvart vil vende attende til arbeidslivet, vil krava til omstilling vere store.

– Mange vil ha behov for anten å ta ei ny utdanning, fullføre avbroten utdanning eller fylle på kompetansen på andre måtar. Endringar i dagpengeregelverket gjer det no mogeleg å kombinere dagpengar med utdanning, seier Bogsnes.

I Vestland tilbyr fylkeskommunen gratis vitnemål eller fagbrev til permitterte og arbeidsledige. Fagskular, studieforbund og andre opplæringsaktørar har òg oppretta utdanningstilbod til næringar som er særleg ramma av restriksjonar i samband med koronaviruset.

– Vi oppmodar alle ledige og permitterte om å vurdere desse mogelegheitene, seier Bogsnes.