Det har vore 3,5 gongar så mange innom nettsida som skal promotere Hyllestad enn det bur innbyggjarar i kommunen.
Hyllestadinfo skal vise mangfald og moglegheiter i kommunen gjennom ei nettside og publisering på Facebook og Instagram. Prosjektleiar er Sarah Sætveit, og med seg har ho Rune Thorsnes og Laila Johannessen. Prosjektet blir styrt frå prosjekthub’en DigiDeg. – Vi har jobba med å samle inn stoff til dei tre kategoriane innbyggjar, bedrift og fritidsaktivitet i løpet av året, og er no godt i gong med publiseringa. Kvar veke legg vi ut ein innbyggjar, to bedrifter og ein fritidsaktivitet, så det er ein ganske høg publiseringsfrekvens. Gjengen som har fått ansvar for det kommunale prosjektet har gått grundig til verks. Alle bedrifter, lag og organisasjonar i Hyllestad som har eit organisasjonsnummer vil bli presentert. – Vi har starta med dei vi har funne i Brønnøysundregisteret, men tar gjerne imot tips til andre fritidsaktivitetar som ikkje har kome med. Det einaste kriteriet vi har er at aktiviteten må vere inkluderande og open for nye deltakarar.Publiseringa i sosiale medier fungerar som marknadsføring, medan nettsida vil få ein arkivfunksjon der folk kan gå inn og lese seg opp på innhald som alt er publisert.