Hydro-prosjektet Uno Metal har no søkt Miljødirektøratet om konsesjon til å behandle nye 150 tonn restmetall.
Som Ytre Sogn tidlegare har fortalt gjennomførte dei i november og desember eit pilotforsøk som gjekk ut på å gjenvinne metallrestane som ligg att i botnen av elektrolyseomnane hos Hydro Høyanger, såkalla bunnkaker, for å kunne bruke det i støyperiproduksjonen. Resultatet var svært vellykka, og no har dei søkt Miljødirektoratet om konsesjon til å behandle ytterlegare 150 tonn, i det som blir ein hovudstudie. – Det opnar også for at vi kan ta imot restmetall frå dei andre Hydro-eigde verka i Norge, seier prosjektleiar Dag Nestegjerde til Ytre Sogn. I pilotforsøket, som vart avslutta 23. desember, behandla dei tilsaman 35 tonn restmetall, som elles hadde blitt seld som skrap til bedrifter i Sverige og Ungarn. – Vi vil no sjå på moglegheiten til å ta i bruk ein annan, større omn, med to luker. Det betyr at vi kan behandle 6-8 tonn i døgnet, mot 4 tonn i den førre, seier han. I hovudstudien, som dei reknar med å bruke fem veker på, vil dei blant anna sjå på økonomien i det som dei håpar kan gje nye arbeidsplassar i Høyanger. – Løn utgjer ein stor del av kostnadane. Difor må vi også ha litt volum, og tek i bruk større omn. Så blir det å vurdere det, opp mot inntektene på å selje det som skrap til eksterne, som er tilfelle i dag, seier Nestegjerde. Les meir i siste utgåve av Ytre Sogn!